Meclis reisi Pakistannıñ Ukrainada elçisi ile körüşti

23 Sentâbr 2011

Meclis yolbaşçısı Mustafa Cemilev Pakistannıñ Ukrainada Vefqulade ve Toluvekâletli elçisi Ahmed Navaz Salim Mela refiqası Şarla Salimni qabul etti. Sentâbr 23 künü Meclis ofisinde olıp keçken körüşüvde Meclis tışqı alâqalar bölüginiñ müdiri Ali Hamzin ve Meclis Kâtibiyetiniñ başı Zair Smedlâyev de iştirak ettiler .

Körüşüvniñ başında Pakistannıñ Ukrainada Vefqulade ve Toluvekâletli elçisi Ahmed Navaz Salim Mela HH asırda sürgünlik ve Vatandan ayırıluv meşaqatlarını çekip, duşmanlıq ve zorbalıq işletmeden Qırımğa qaytmağa küç-qudret tapqan ve bunıñnen özüniñ yüksek medeniyeti ve maneviy zekâsını numayış etken qırımtatar halqınıñ cesürligine yüksek qıymet kesti.

“Qırımtatarlar tarihınıñ facialı saifeleri, Vatandan uzaqta yaşağan yılları ve Qırımğa qaytuvnıñ ağırlıqları milliy özgünligi ve milliy birlikni saqlaya bilgen qırımtatar halqınıñ cesürliginen ayretlenmege esas bere”, – dedi pakistanlı elçi Meclis reisine hıtap eterek. Qırımtatarlarnıñ birlik-beraberligine yüksek qıymek kesip, bu, halqnıñ vekâletli organı olğan Meclisniñ, teşkilâtiy qabiliyetinden delâlet bergenini köstere. Cenap Elçi qırımtatar halqınıñ öz tarihiy yurtunda inkişaf etmesi ve ilerilemesine eminlik bildirdi.

Qırım regionı içtimaiy-iqtisadiy potentsialınıñ muzakeresi devamında Pakistan elçisi: “Qırım ve Ukraina bir çoq devletler içün eñ közge körüngen iqtisadiy ortaqlardır. Yaqın vaqıtta Pakistan islâm memleketi Ukraina ile siyasiy, iqtisadiy ve medeniy alâqalarnı kenişletmekniñ imkânlarını baqmaq meramında”, dedi.

Pakistanlı elçini selâmlağan Meclis reisi M. Cemilev, qırımtatar halqı içün Pakistan islâmnı kütken dindaş ve keçken asırda öz mustaqilligi içün küreşip, çoq çekişken bir ülke olaraq yaqındır, dedi. “Qırımtatarlarnıñ kerçekten de facialı tarihı bar. Biz 50 yıldan ziyadedir ki, Vatanımızğa qaytmaq oğrunda iç kimseniñ qanını tökmeden, milliy areketniñ demokratik printsiplerine esaslanğanımız alda küreşkenimiznen ğururlanamız”, – dedi Meclis reisi. Bunıñ kibi de reis, bugün de öz aq-uquqlarınıñ ğayrıdan tilenmesi içün küreşlerini devam etken qırımtatarlar Ukrainanıñ vatanperverleri olaraq devlette demokratiya ve Avropağa qatıluv inkişafınıñ tarafdarları olğanını qayd etti.

“Teessüf ki, qırımtatar cemiyeti içinde tertip-intizam yüksek derecede olğanına baqmadan, bugünde=bugun biz özgünligimizni coymaq telükesi qarşısındamız. Bunıñ sebebi 20 yıldan berli mustaqil olğan Ukrainada qırımtatar halqınıñ inkişafı boyunca memleket parlamenti tarafından ait qanun bazası qabul etilmegeni neticesinde umumdevlet programmasınıñ olmağanındadır.

Bütün bu şeyler ise milliy tasilge menfiy tesir ete, on balamızdan faqat biri ana tilini, o da tolu programma boyunca degil, ögrenmek imkânına maliktir”, – dedi Meclis reisi pakistanlı musafirnen subetinde ve aynı zamanda oña qırımtatar halqı adına söyledigi samimiy sözleri içün minnetdarlıq bildirdi.

Meclis reisi umummilliy mesele aqqında da ayrıca ayttı, yani qırımtatarlarnıñ bayağı qısmı sürgünlik yerlerinde, esasen Orta Asiya cumhuriyetlerinde yaşamaq zoruna qalıp, Qırımğa qaytmaq ve aqrabalarınen qavuşmaq imkânından mahrumlar.

“Biñlernen qırımtatar ailesine toqunğan mezkür problema halqara miqyasta insan uquqları bozulmasınıñ eñ ağır şekilidir” , qayd etti M.Cemilev.

Mustafa Cemilev elçiniñ diqqatını qırımtatar halqını birleştirüv, semetdeşlerini yurtuna qaytaruv ve içtimaiy-iqtisadiy em de uquqiy meselelerniñ çezilüvi oğrunda Meclis maksimal areket etkenine celp etti. Onıñ fikrince, SNG devletleri sürgün etilgen halqlarnıñ ögünde Bişkek halqara añlaşmasındaki normalar boyunca mecburiyetlerini eda etmegenleri alda. Ukraina tek başına qırımtatar halqınıñ meselesini çezip olamaz. “Şu munasebetnen biz Qırımtatar halqınıñ öz Vatanında aq-uquqlarını ğayrıdan tiklev, onıñ Ukrainada telükesizligini teminlev meselesi boyunca halqara forumnı keçirmek teşebbüsinen çıqtıq, – dedi Meclis reberi.

Tafsilâtlı smubet devamında taraflar qırımtatar iş adamları ve Pakistan iş daireleri arasında emekdaşlıq istiqballerini muzakere ettiler. Elçi Meclis reisine 2011 senesi Pakistannıñ Karaçi şeerinde ötkerilecek iqtisadiy sergige qırımtatar vekillerini yollamaqnı teklif etti.

Pakistan islâm cumhuriyetiniñ elçisine muracaat etip, uzun müddetli ve keniş alâqalarnı inkişaf ettirüvge çağırğan Meclis reisi “Ukrainada qırımtatar faktorını hristian Ukrainası ve islâm dünyası arasında köpür olaraq qabul etilmesini qayd etti. Bu faktor endi çoqtan berli dünyanıñ belli siyasetçileri tarafından öyle de baqıla ve islâm alemini bizim devletnen, Ğarp degerlikleri ile yaqınlaştıra”, – dedi eminliknen Cemilev.

Cenap elçi refiqası ile Qırımda bulunuvınıñ çerçivesinde yarımadanıñ tari hiy paytahtı Bağçasaraynı da ziyaret etmek, qırımtatar tarihiy ve medeniy yadikârdıqlarınen tanış olmaqnı planlaştıra.