Meclis reisi Mustafa Cemilevniñ Praga, Frankfurt-Mayn, Kerpen ve Kölnge ziyareti yekünlendi

28 April 2013

2013 senesi aprel 24-26 künleri Meclis reisi Mustafa Cemilev Çehiya ve Almaniyada iş ziyaretinen bulundı. Aprel 24 künü Pragağa kelgeninen M. Cemilev “Azatlıq” radiosına davet etildi. Anda o, radionıñ ukrain muarririyeti direktorı Mihail Mihalisko ve onıñ muavini Nataliya Çurikova ile körüşti. M. Cemilev ukrain, rus, tatar-başqırt, şimaliy kavkaz ve azerbaycan hızmetlerine intervyü berdi .

Aprel 25 künü Meclis reisi Çehiya Cumhuriyeti Tış işleri naziri Karel Şvartsenberg ile körüşti.

Aynı şu künü Çehiya Parlamentiniñ Senatında belli çeh jurnalisti ve uquqqoruyıcısı, senator Yaromir Ştetina ile körüşti. Aqşam Praga Seyahatçılar klubında ise çeh cemaatçılığınen körüşti. Bu tedbirni “NAVYCHOD” mecmuasınıñ muarriri İvana Skalova ve “Şarq-Avropa programması” Demokratiyanı inkişaf etüv ve insan aqlarını qorçalav merkeziniñ hadimi Aljbeta Hmelarova teşkilâtlandırdılar.

Aprel 26-da Almaniyanıñ Frankfurt-Mayn şeerinde Meclis reisi Almaniya Türkler federatsiyasınıñ baş kâtibi Şentürk Doğruel, soñra Kerpende musulman dünyasınıñ belli erbabı, Almaniya musulmanlarınıñ liderlerinden biri, İslâm Cemiyetleri Milliy Merkeziniñ baş kâtibi Öguz Üçünci ile körüşti.

Şu künniñ ekinci yarısında Kölnde Meclis reisi Ğarbiy Avropa qırımtatarlarınıñ medeniyet ve yardımlaşma cemiyetiniñ reisi Rafet Qaranlıq ve Meclisniñ Almaniyadaki temsilcisi Ahmet Ozay teşkilâtlandırğan körüşüvde iştirak etti. Aqşam Almaniyadaki qırımtatar diasporası Meclis reisi Mustafa Cemilevniñ şerefine bergen yemekte Almaniyadaki 20 büyük türk ve musulman cemiyetleriniñ yolbaşçıları bulundılar.

Mustafa Cemilevnen beraber bu ziyarette Meclis tışqı alâqalar bölüginiñ başı Ali Hamzin. Kiyevdeki qırımtatarlar cemiyetiniñ başı Aslan Ömer Qırımlı ve Qurultay delegatı Rustem Ümerov bulundılar.