Meclis reisi Mustafa Cemilev ve Meclisniñ bir sıra azaları «Küreşken Göñüldeşlik Haçı» ordeninen taqdirlendiler

18 March 2013

Mart 16 künü Vrotslavda “Küreşken Göñüldeşlik Cemiyeti”niñ ofisinde Qırımtatar halqı Meclisiniñ reisi, Ukraina halq deputatı Mustafa Cemilev tantanalı sürette “Küreşken Göñüldeşlik Haçı” ordeninen taqdirlendi.

Bu mukâfatqa Meclis azazaları Zair Smedlâyev ve Ali Hamzin, “Qırım” hayriye fondınıñ direktorı Riza Şevqiyev de nail oldılar. Meclis Kâtibiyetiniñ başı Zair Smedlâyev tantanalı merasimde şahsen iştirak etip olamadı, çünki 2006 senesi iyün 22-de Qırım Apellâtsion mahkemesinde “Cotton club” barındaki vaqia iştirakçileriniñ işi baqılğanda binanıñ qarşısında “cemaat tertibini bozğanı ve militsiya hadimlerine qarşılıq köstergeninde” mahkeme qararınen qabaatlı tanılğan Zair Smedlâyevge yurttan çıqış yasaq etildi.

Yüksek mukâfatlarnı “Küreşken Göñüldeşlik Cemiyeti”niñ reisi Körnel Moravetskiy taqdim eterken,1944 senesi mayıs 18 sürgünliginden soñ öz aqları oğrunda kommunist rejimine qarşı küreşken qırımtatar halqınıñ milliy areketine yüksek qıymet kesti.

Meclis reisine hıtap etken Körnel Moravetskiy “Küreşken Göñüldeşlik Cemiyeti” içün kommunist rejimine qarşı faal küreşçi Mustafa Cemilevni qabul etmek – büyük bir şereftir”, dedi. “Siz bu ağır küreşte biz içün ilk örnek oldıñız. Sizge temenna etemiz ve musaadeñiznen sayğı ve ayretimizni ifade etmek isteymiz”, – dedi “Küreşken Göñüldeşlik Cemiyeti”niñ reisi Körnel Moravetskiy

Mukâfatlar taqdim etilgen soñ merasim iştirakçileri ögünde Meclis reisi Mustafa Cemilev çıqışta bulundı. O, da öz nevbetinde Qırımtatar halqı vekâletli organınıñ vekillerini böyle nufuzlı ordenge lâyıq körgenleri içün “Küreşken Göñüldeşlik Cemiyeti”niñ yolbaşçılarına teren minnetdarlığını bildirdi.

“Poloniyalılar ve qırımtatar halqını daima facialı ve mustaqillik oğrunda şanlı vaqialarnen tolu bir taqdir bağladı. Ve bugün biz epimiz birleşip, Ukrainanıñ Avropa Birligi halqlarınıñ ailesine qatılmaq kibi miuim meseleni çezüvde beraber olmaq kerekmiz. Eminim ki, biz ukrain, leh ve qırımtatar halqını daa ziyade birleştirgen ğalebeni elde etermiz”, – dedi Meclis yolbaşçısı.

Tantanalı merasimniñ soñunda Meclis reisi Mustafa Cemilev ve “Küreşken Göñüldeşlik Cemiyeti”niñ reisi Körnel Moravetskiy Qırımtatar halqınıñ meclisi ve “Küreşken Göñüldeşlik Cemiyeti”niñ işbirligi aqqında Deklaratsiyanı imzaladılar.

Deklaratsiyanıñ 1-nci maddesine binaen Qırımtatar halqınıñ meclisi ve “Küreşken Göñüldeşlik Cemiyeti”niñ daimiy informatsion haberleşmesini teminlemek maqsadında er eki taraftan dörter insandan ibaret Daimiy Koordinatsion gruppa meydanğa ketirildi.

Qırımtatar halqınıñ meclisi koordinatsion gruppağa Meclis reisiniñ birinci muavini Refat Çubarov ve Tışqı alâqalar bölüginiñ başı Ali Hamzinni delege ete. “Küreşken Göñüldeşlik Cemiyeti”ni gruppada

Petr Hleboviç ve Nikolay İvanov temsil etecekler.

Mart 18 künü Varşavada bunıñ kibi de Meclis yolbaşçısı Mustafa Cemilev Şarqiy Avropada demokratiya içün institutnıñ prezidenti İrena Lasoto ile körüşti.