Meclis reisi Mustafa Cemilev V Qurultaynıñ delegatlarına mahsuldar ve semereli çalışqanları içün teşekkür bildirdi

22 Iyül 2012

22 iyül künü V çağırılış Qurultayı 4-nci sessiyasınıñ işine yekün çekken Meclis reisi Mustafa Cemilev delegatlarğa mahsuldar ve semereli çalışqanları içün teşekkür bildirdi

“V çağırılış Qurultayınıñ 4-nci sessiyasınıñ kün tertibine qoyulğan meseleler delegatlar tarafından baqıldı, muzakere etildi ve er biri boyunca ait qararlar alındı”, – dep qayd etti M. Cemilev.

M.Cemilev emin ki, V çağırılış Qurultayınıñ 4-nci sessiyasında qabul etilgen qararlar, vesiqalarğa kirsetilgen deñişme ve qoşumcalar sayesinde qırımtatarlarnıñ milliy sisteması açıq ve demokratik olğanını daa bir kere isbat etti.

“Eger biz bu yönelişte çalışmaqnı devam etsek ve daima demokratik olıp, öz-özümizni idare etüv milliy organlarına saylavlarda sahtekârlıqqa yol bermesek qırımtatar halqı öz milliy akimiyet organlarına daa ziyade işanır ve öz vekillerini saylar”, – dep devam etti Meclis reisi.

Meclis reisi Mustafa Cemilev delegatlarğa “Ukraina halq deputatlarını saylav ve qırımtatar halqı öz-özüni idare etüv milliy organlarınıñ vazifeleri aqqında Qurultaynıñ qararı”nı eda etüv çerçivesinde qırımtatarlarnıñ 2012 senesi oktâbr 28-de olacaq saylavlarda qırımtatarlarnıñ pozitsiyası aqqında qarar aluvda Mecliske işanç bildirgen delegatlarğa minnetdarlıq bildirdi.

Çıqışınıñ soñunda Mustafa Cemilev V çağırılış Qurultayınıñ 4-nci sessiyasını azırlav ve keçirüvde yardım etken, bunıñ kibi de Qurultaynıñ 21-22 iyül künlerinde işini canlı yayınlağan ATR televizion kanalınıñ hızmetlerini ayrıca qayd etti. “Ukraina ve onıñ tışında yaşağan qırımtatarlar milliy qurultaynıñ işini közetmek imkânına malik oldılar”, – dedi M. Cemilev.

Bundan da ğayrı M. Cemilev Qurultay delegatlarınıñ adından V çağırılış Qurultayı 4-nci sessiyasınıñ keçirilmesini maddiy ceetten teminlegen Qırım halqara biznes birleşmesine de teşekkür bildirdi.

Şunı hatırlatamız ki, iyül 21-22 künleri Aqmescitte Qırımtatar halqı V çağırılış Qurultayınıñ 4-nci sessiyası olıp keçti. Eki künlük iş devamında Qurultay delegatlarını saylav printsipleri, 2012 senesi oktâbr ayında olacaq Ukraina halq deputatlarını saylavlar, qırımtatar halqınıñ resmiy simvolları – milliy bayraq, tuğra ve gimni, Qırımtatar halqı Qurultay delegatlarını saylav boyunca Merkeziy saylav komissiyası aqqında meseleler baqıldı.

Kurultay işinde 200 delegat, Ukrainada akkreditatsiyadan keçken elçilikler, halqara teşkilâtlar, Ukraina ve Qırım akimiyetiniñ ve bunıñ kibi de Amerika, Türkiye, Romaniyadaki qırımtatar diasporasınıñ vekilleri iştirak ettiler.