Meclis reisi Mustafa Cemilev – Ukrainanıñ eñ nufuzlı 100 adamı sırasında

01.09.2012

«Korrespondent» mecmuası TOP -100 er yıllıq leyha çerçivesinde Ukrainanıñ eñ nufuzlı 100 adamınıñ adlarını seslendirdi

Reytingge Ukraina Prezidenti Viktor Yanukoviç yetekçilik yapa.

Mecmuanıñ versiyası boyunca ekinci yerde ukrain iş adamı Rinat Ahmetov, üçünci yerge ise keçken senede olğanı kibi Prezident memuriyetiniñ başı Sergey Lövoçkin köterildi, dörtünci yerde – MAKO holdingniñ saibi, Prezidentniñ üyken oğlu Aleksandr Yanukoviçtir. Group DF direktorlar keñeşiniñ başı Dmitriy Firtaş beşinci yerni aldı.

Yüz nufuzlı insan sırasına Ukraina halq deputatı, Qırımtatar halqı Meclisiniñ reisi Mustafı Cemilev de kirdi. O, 76-nci yerde. Onıñ reytingi keçken yıldakisine köre üç noqta töpege köterildi, keçken sene o, 79-ncı yerde edi.

TOP -100 sırasına qırımlılardan Qırım Nazirler şurasınıñ reisi Anatoliy Mogilev kirip, 57-nci yerni aldı.Onıñ reytingi bu yılı 46 noqtağa aşağı endi.

Ukrainanıñ sabıq baş naziri Yuliya Timoşenko 13-nci yerde, “Front Zmin”(Deñişmeler cebesi) partiyasınıñ lideri Arseniy Yatsenük 9-nci yerni işğal etti.

Nufuzlı insanlarnı seçüvde “Korrespondent” mecmuası siyasetçilerniñ kütle arasında itibarı, memleket ömürine tesir seviyesi, iş adamlarınıñ saip oldığı ve idare ettigi kompaniyalarnıñ kölemi, medeniyet ve sport erbaplarınıñ ise mühlisleri arasında sevgi qazanmasını esapqa aldı.

Böyleliknen, dep yaza “Korrespondent” mecmuası TOP-100 reytingi – ekspertlerniñ fikirine bazanğan mecmua muarririyetiniñ qararıdır. Ekspertler cevdelinde Vaziyetni şekillendirüv agentliginiñ direktorı Vitaliy Bala, Berta Communications kompaniyası personal ve strategik konsalting müdiri Taras Berezovets, Ukraina siyaseti institutı idaresiniñ başı Köst Bondarenko, Londrada Ukraina institutınıñ direktorı Andrey Günder, Dragon Capital yatırım kompaniyasınıñ ortaq direktorı Tomaş Fiala bulunmaqtalar.