Meclis reisi Mustafa Cemilev Ukraina Prezidenti yanında İçtimaiy sotsial keñeş toplaşuvında iştirak etti

04 Iyül 2012

2012 senesi iyül 3 –te Ukraina Prezidenti yanında İçtimaiy sotsial keñeşniñ toplaşuvı Ukraina Prezidenti Viktor Yanukoviçniñ reisliginde keçirildi.

Keñeşniñ işinde iştirak etken Qırımtatar halqı Meclisiniñ reisi, Ukraina halq deputatı Mustafa Cemilev öz çıqışında milletlerara munasebetlerni uyğunlaştırmaq yolunda ukrain devleti Devlet etnik milliy siyaset köntseptsiyasını qabul etüv yolunen birinci adımlarnı attı, dep qayd etti. Meclis yolbaşçısı İçtimaiy sotsial keñeşke ve devlet yolbaşçısına mezkür vesiqanıñ qabul etilmesini tezleştirmek maqsadınen Köntseptsiyanıñ eki leyhasını bir kereden qabul etmek teklifinde bulundı.

Belli ki, Köntseptsiya leyhaları birisiniñ müellifi M. Cemilevdir, ekinci leyha ise Ukraina ükümeti tarafından berildi. “Eger ükümet leyhasına menim leyhamdan bir qaç nizam kirsetilse, men müelliflikten vazgeçmege azırım. Bunıñ içün ait avale berilip, eki aftalıq tatil vaqtında parlament-ükümet işçi gruppasını meydanğa ketirmek lâzim”, dep qayd etti M. Cemilev.

Bundan da ğayrı M. Cemilev Ukraina Prezidentine ve toplaşuv iştirakçilerine Ukrainada milletlerara müitni stabilleştirüvde müim vesiqalardan biri olaraq “Ukraina devlet etnik milliy siyaseti: muvafaqiyetler ve istiqballer” mevzusında parlament diñlevler tevsiyeleri boyunca qararnı belgilenmek teklifinen çıqışta bulundı. Mezkür mesele boyunca iyül 5 künü rey berilecek. M. Cemilevniñ söylegenine köre Tevsiyelerde milliy siyaseti meseleleri boyunca mahsus vekâletli ükümet organını ğayrıdan tiklemek teklifi ayrıca qayd etilmek kerek.

Öz çıqışında Meclis reisi M.Cemilev şunı da hatırlattı ki, 2012 senesi iyün 20-de Yuqarı Şura “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Qanun leyhasını birinci oquvda qabul etti. “Şimdi oña deputatlar tüzetüv ve qoşumcalar kirseteler. Qanun pek zarur, Müim ve adaletlidir. O mıtlaqa qabul etilmesi kerek”, – dedi Cemilev. Onıñ aytqanına köre, Devlet hadimlerinen körüşip, qanunnı amelge keçirmekniñ maliyeviy qısmı boyunca kelişmege azır olğanını bildirgen. Amma qanunnıñ qabul etilmesi soñki eki yılda olğanı kibi kimniñdir siyasiy iradesine bağlı olacaq olsa, er angi beraberlikteki iş boşuna çıqar.

Ukraina Prezidentine hıtap eterek, M.Cemilev Viktor Yanukoviçke 2010 senesi imzaladığı Fermannı hatırlattı. Onda 5515 raqamlı leyhanıñ qabul etilmesi boyunca devlet yolbaşçısınıñ fikiri açıq ifade etilgen.

Meclis reisi Ukraina Prezidentiniñ fikri deñişmeyip, akt qabul etilecegine ven imzalanacağına ümüt bildirdi. Çıqışınıñ soñunda M. Cemilev devlet yolbaşçısınıñ diqqatını Ukrainada Sürgün etilgenlerniñ aqlarını teminlev boyunca halqara forum keçirüv meselesine celp etti. “Forumğa azırlıq ve muzakere ceryanı şimdilik toqtatıldı. Men bu meseleni şahsen nezaret etmeñizni ve İçtimaiy sotsial keñeşke Ukraina Prezidentiniñ ait qararı leyhasını azırlamaqnı avale etmeñizni rica etem”, dedi Cemilev.

Resimler www.president.gov.ua saifesinden alındı