Meclis reisi Mustafa Cemilev Türkiyeniñ Avropa Birligi işleri boyunca naziri Egemen Bağış ile körüşti

21 Sentâbr 2013

2013 senesi sentâbr 20 künü Bağçasarayda Milliy Meclis reisi, Ukraina halq deputatı Mustafa Cemilev Qırımğa Yalta Avropa Strategiyası 10-ncı forumında iştirak etmek içün kelgen Türkiyeniñ Avropa Birligi işleri boyunca naziri Egemen Bağış ile körüşti. Nazirge Türkiyeniñ Ukrainadaki Elçisi
Mehmet Samsar refaqatlıq yaptı.

Körüşüv devamında Meclis başqanı Türkiyeniñ Avropa Birligi işleri boyunca naziri Egemen Bağışnen Avropa Birligi Komissarı Ştefan Füle ile, bunıñ kibi de Ukraina Tış işleri naziri L. Kojara ve Qırım Nazirler Şurası yolbaşçılarınen körüşüviniñ neticelerinen paylaştı.

“Avropa Birliginiñ komissarı Ş. Füle Meclisniñ Halqara forumnı 2014 senesi qırımtatar halqınıñ Vatanından sürgün etilgeniniñ 70 yıllığı arfesinde keçirmek teşebbüsine qoltuttı, – dedi M. Cemilev. – Tögerek masa subetiniñ iştirakçileri 3 saat devam etken muzakere vaqtında qırımtatar halqınıñ vaziyetine dair meseleler ve olarnı çezüvde halqara cemaatçılıqnıñ rolünen bağlı meselelerni baqıp çıqtılar”.

Türkiyeniñ Avropa Birligi işleri boyunca naziri Egemen Bağış Avropa Birligi komissarı Ş. Füle Halqara forumnıñ qırımtatar halqınıñ meselelerini çezüvde Ukraina içün rolü aqqında seslendirgen fikrine qoltutqanını bildirdi.

Taraflar bunıñ kibi de TİKA yardımında medeniy ve mesken leyhalarınıñ, şu cümleden Büyük Cuma Cami ve Qırımtatar medeniy merkezi qurucılığınıñ istiqballerini muzakere ettiler.

Türkiyeniñ Avropa Birligi işleri boyunca naziri Egemen Bağış Mustafa Cemilevge körüşüvde köterilgen meselelerni eñ yaqın zamanda Türkiye Baş naziri Recep Tayip Erdoğanğa bildirecegini işandırdı.