Meclis reisi Mustafa Cemilev Türkiye Cumhuriyetiniñ Litvaniyadaki Elçisi Akin Algan ile körüşti

28 June 2013

Meclis delegatsiyasınıñ Litvaniya Cumhuriyetine ziyareti çerçivesinde ve Türkiye Cumhuriyetiniñ Litvaniyadaki Elçisi Akin Algannıñ davetine köre Milliy Meclis reisi Mustafa Cemilev ve delegatsiya azaları Refat Çubarov, Ali Hamzin, Aslan Ömer Qırımlı, bunıñ kibi de Meclisniñ Litvaniyadaki temsilcisi, Litvaniya tatarları cemiyetiniñ başı Adas Yakubauskas 2013 senesi iyün 26 künü Türkiye Cumhuriyetiniñ Litvaniyadaki Elçihanesini ziyaret ettiler.

Körüşüv devamında Elçilikte qırımtatar halqınıñ vaziyeti ve Halqara forumğa azırlıqnıñ ketişatına dair meseleler muzakere etildi.

Türkiye Cumhuriyetiniñ Litvaniyadaki Vefqulade ve Toluvekâletli Elçisi öz musafirlerini Litvaniya tatarlarınıñ tili, tarihı ve medeniyetini saqlap qaluv saasında Türkiye Cumhuriyetiniñ destegi ile amelge keçirilgen leyhalarnen tanıştırdı.

Türkiye Cumhuriyetiniñ Litvaniyadaki Elçisi Akin Algan Milliy Meclis reisi Mustafa Cemilevniñ şerefine bergen aqşam yemegi dostane subet ve fikir paylaşuv müitinde keçti.