Meclis reisi Mustafa Cemilev Türkiye Cumhuriyeti Şimaliy Qıbrıznı ziyaret etti

22 Iyül 2013

2013 senesi iyül 19-21 künleri Milliy Meclis reisi, Ukraina halq deputatı Mustafa Cemilev Türkiye Cumhuriyeti Şimaliy Qıbrız Parlamentiniñ reisi Hasan Bözerniñ daveti ile Türkiye Cumhuriyeti Şimaliy Qıbrızda bulundı.

Meclis reisi Mustafa Cemilevge Kiyev şeeri qırımtatar cemiyetiniñ başı Aslan Ömer Qırımlı refaqatlıq yaptı.

Meclis reisi ziyaretiniñ baş maqsadı türk silâlı küçlerniñ Qıbrızda arbiy devirüv yapqan, adanı türklerden temizlemege ve adanı Yunanistanğa qoşmağa tırışqan “qara polkovnikler”ge qarşı areketleriniñ 39 yıllığı munasebetinen ötkerilgen resmiy tedbirlerde iştirak etmek edi.

Nikosiyada Fazıl Kuçuk adına merkeziy bulvardaki numayıştan soñra Meclis başqanı TCŞQ Prezidenti Derviş Eroğlu, baş nazir Sibel Siber, parlament reisi Hasan Bözer ve Orta Şarq universitetiniñ rektorı Suat Günsel ile körüşip, Qırım ve Şimaliy Qıbrız arasındaki medeniy ve iş bağlarını pekitüv meseleleri muzakere etildi.

Meclis reisi M. Cemilev universitet rektorına Meclisniñ Tasil idaresinde testlerden keçken ve Orta Şarq universitetinde 2013 senesinden oqup başlaycaq yañı studentlerniñ cedvelini berdi.

Şimaliy Qıbrız baş naziri Sibel Siber ile körüşüv vaqtında Mustafa Cemilev Qırım ve Qıbrız arasındaki tarihiy alâqalar aqqında söylerken şunı hatırlattı ki, 150 let evelsi Qırımdan qaçaqlarnen tolu gemi Qıbrız adasına kele ve 150-200 qırımtatar ailesi adada yerleşe. O zaman ada Osmanlı imperiyasına bağlı degil edi. Bunı diñlegen Sibel hanım tebessüm ile o gemide menim de ecdatlarım bar ediler, dedi.

İyül 20 künü iftar vaqtında Milliy Meclis reisi Mustafa Cemilev Qıbrızğa kelgen Türkiye baş naziriniñ muavini Beşir Atalay ve Türkiye Meclisiniñ başqanı Cemil Çiçek ile de körüşti. Qırımtatarlarnıñ meseleleri aqqında tafsilâtlı qonuşmaq içün Cemil Çiçek Mustafa Cemilevni avgust ayında Anqarağa davet etti.

Ziyaret devamında Meclis başqanına Meclisniñ Qıbrızdaki temsilcisi, Türkiye İş bankasınıñ Qıbrızdaki bölüginiñ başı Selâmi Qaçamaq refaqatlıq yaptı.