Meclis reisi Mustafa Cemilev Taras Şevçenko doğğan kününe bağışlanğan tedbirde iştirak etti

09 Mart 2012

2012 senesi mart 9 künü büyük Ukrainanıñ milliy deası, şair ve ressam Taras Şevçenko doğğanına 198 yıl toldı. Bu künü biñlernen insan, şu cümleden Ukraina Prezidenti Viktor Yanukoviç de, milliy qaraman, Kobzarniñ qabirini ziyaret etmege keldi.

Ukraina Prezidenti Viktor Yanukoviç Memuriyetiniñ daveti boyunca Milliy Meclis reisi Mustafa Cemilev Taras Şevçenko doğğan kününe bağışlanğan tantanalı tedbirlerde iştirak etip, Çerkassı vilâyetindeki Kanevde Tarasov dağında Taras Grigoryeviç Şevçenkonıñ mezarına “Qırımtatar halqı Meclisinden” dep yazılı bir sepet çeçek qoydı.

Taras Grigoryeviçniñ mezarına çeçek qoymağa kelgenlerni qarşılağan Ukraina Prezidenti Viktor Yanukoviç Mustafa Cemilevge hatıra merasimindeki iştiraki içün teşekkür bildirdi.

Doğğan künni qayd etüv merasimleri çerçivesinde Kanevde Taras Şevçenko müzeyinde Ukraina Prezidenti Viktor Yanukoviç 2012 senesi Şevçenko mukâfatınıñ saiplerine diplomlarını berdi.

Şevçenkonı añma ve qabirine çeçekler qoyuv tedbirlerinde Kiyevde qırımtatar cemiyetiniñ reisi Aslan Ümerov da iştirak etti.