Meclis reisi Mustafa Cemilev Saudiya Arabistanına muqaddes topraqlarğa Ümrege yol aldı

31 Iyül 2013

Mubarek Ramazan ayında Milliy Meclis reisi Mustafa Cemilev Saudiya Arabistanına muqaddes topraqlarğa Ümre yapmaq içün seferge çıqtı.

Ramazan ayınıñ soñki on künü, içersinde Qadır gecesi olğanda Meclis yolbaşçısı Mustafa Cemilev Kiyevdeki qırımtatar cemiyetiniñ başı Aslan Ömer Qırımlı ile beraber Saudiya Arabistanınıñ Mekke şeerinde yani Allağa ibadet etilgen birinci yerde Ümre yapmaqtalar.

Bundan da ğayrı Mustafa Cemilev Saudiya Arabistanı Qırallığında devletniñ siyasiy ve diplomatik daireleri vekillerinen bir sıra müim körüşüvler keçirecek.

Meclis reisi Mustafa Cemilev ve Kiyevdeki qırımtatarlar cemiyetiniñ reisi A.O. Qırımlı Saudiya Arabistanında ziyaretnen Qırallıqnıñ Ukrainadaki Elçisi Cüdiyu Ben Zabin Alhzalnıñ daveti ile bulunmaqtalar.

Meclis yolbaşçısı Mustafa Cemilev ve Kiyevdeki qırımtatar cemiyetiniñ başı Aslan Ömer Qırımlı Saudiya Arabistanında 2013 senesi avgust 4-ke qadar bulunacaqlar

Malümat içün: Ümre – Mekke ve Mescid-al Haramnı ziyaret etüvnen bağlı küçük acılıq sayılıp, Hac içün belgilengen ayda degil de, yılnıñ er angi başqa vaqtında yapıla.