Meclis reisi Mustafa Cemilev Romaniyanıñ Odessadaki Baş konsulı Emil Rapça ile körüşti

20 December 2012

2012 senesi 20 dekabr künü Meclis ofisinde Qırımtatar halqı Meclisiniñ reisi, Ukraina halq deputatı Mustafa Cemilev Romaniyanıñ Odessadaki Baş konsulı Emil Rapça ile körüşti. Körüşüvde Meclis reisiniñ birinci muavini Refat Çubarov, Meclis tışqı alâqalar bölüginiñ başı Ali Hamzin ve Kâtibiyet reberi Zair Smedlâyev de iştirak ettiler.

Bu, Romaniyanıñ Odessadaki baş konsulınıñ Qırımğa ilk resmiy ziyaretidir, mında o, iş körüşüvlerini keçirdi. “Qırımğa kelüvimniñ maqsadlarından biri – Qırımtatar halqı Meclisiniñ yolbaşçılarınen tanışmaq edi”, – dep bildirdi cenap Rapça. Baş konsul Romaniyadaki qırımtatar diasporası vekillerinen tanış olğanını aytıp, olarnıñ milliy özgünliklerini saqlav yolundaki areketlerine yüksek qıymet kesti.

Bundan da ğayrı Romaniya diplomatı Dobruca tatarlarınıñ Qırımtatar halqınıñ qurultayı tasdiqlağan latin urufatına keçüv qararına qoltutqanını bildirdi.
Baş konsul Emil Rapça ile subet devamında Meclis reisi Mustafa Cemilev qayd etti ki, romen cemiyetinde demokratik printsipler inkişafınıñ yüksek seviyede olğanı sayesinde Romaniyada qırımtatar diasporasına nisbeten şovinistik areketler iç yapılmay, milliy ve diniy duyğularına sayğı kösterile.

“Biz semetdeşlerimizniñ alınen memnünmiz ve olarnıñ faal oluvlarına qoltutqan Romaniya devletine teşekkür bildiremiz”, – dedi Mustafa Cemilev ve qırımtatar diasporası Romaniya ve Qırım arasındaki dostluqnıñ köpüridir, diye söyledi.

Romaniya diplomatınıñ ricasına köre Meclis reisiniñ birinci muavini Refat Çubarov mahsus onıñ içün Qırım ve onıñ tamır halqı olğan qırımtatarlarnıñ tarihını qısqadan tarif etti. Musafirni yarımadanıñ coğrafik haritası ile tanış eterken, Refat Çubarov Qırım hanlığınıñ parlaq devri, Noman Çelebicihannıñ faaliyeti ve facialı ölümi, sürgünlik ve soyqırım aqqında ikâye etti.

“Qırımnıñ tamır halqı olğan qırımtatarlarnıñ adını bile añmaqnı yasaq etüv sovet rejiminiñ baş maqsadlarından biri edi”, – dep qayd etti Çubarov. Reisniñ birinci muavini aytqanına köre, çoqyıllıq sürgünlikten soñ Vatanğa qaytayatqan halq qırımtatarlarnıñ aqları devlet seviyesinde tanılmasını talap etkenini de ayttı. Bu esnada Meclisniñ teşebbüsi boyunca ötkerilecek ve OSCE tarafından qoltutulğan Halqara forum Ukraina içün “qırımtatar halqınıñ meselesini çezüvde” küçlü bir siltem olurdı.

“Biz Avropanıñ eñ ileri devletlerinden biri olğan Romaniya devletine Ukrainada qırımtatar halqınıñ aqlarını tiklev boyunca halqara forum keçirilmesine qoltutmasını rica etemiz”, – diye muracaatta bulundılar cenap Emil Rapçağa Meclis yolbaşçıları

Öz nevbetinde Baş konsul dialognı devam ettirmek ve Halqara forum keçirüv meselesini Qırımdan qaytqan soñ öz iş kabinetinde muzakere etmekni işandırdı.