Meclis reisi Mustafa Cemilev: qırımtatarlarnıñ «Dereköy» medeniy-etnografik merkezniñ baş maqsadı qırımtatar halqınıñ medeniy asabalığını saqlap qalmaqtır

12 Iyün 2012

2012 senesi iyün 12 künü “KRIM” FOND” hayriye teşkilâtı Yaltada qırımtatarlarnıñ birinci “Dereköy” medeniy-etnografik merkezini açtı.

Tantanalı merasimde Qırımtatar halqı Meclisiniñ reisi Mustafa Cemilev ve Yalta şeer başınıñ muavini Yelena Yürçenko iştirak ettiler.

“Dereköy” medeniy-etnografik merkeziniñ azbarında Yalta sakinleri ve çoqtan-çoq musafirler toplanıp, olarnıñ içinde “FOND “KRIM” hayriye teşkilâtınıñ reisi Riza Şevqiyev, Yalta şeer şurası milletlerara munasebetler ve migratsiya idaresiniñ başı Zaur Smirnov, TİKA programmasınıñ Qırımdaki koordinatorı Ahmed Çinar, Meclis tasil ve medeniyet idaresiniñ başı Safure Kacametova, Qırımtatar qadınlar birliginiñ reisi Safinar Cemileva, çeşit qırımtatar cemaat teşkilâtlarınıñ vekilleri, ameliy sanat ustaları bar edi.

Bayramnıñ tantanalı qısmını “Cemile” ansambliniñ oyuncıları yaraştırdılar.

“FOND “KRIM” hayriye teşkilâtınıñ reisi Riza Şevqiyevniñ bildirgenine köre, Qırımtatar medeniy etnografik merkezini meydanğa ketirüv teşebbüsinen yaltalı faaller çıqıp, buña Milliy Meclis reisi qoltuttı. Merkez açılışına Zarema Menseitova da pek büyük isse qoştı.

Qırımtatar medeniy-etnografik merkezniñ tışı qırımtatar üslübinde süslenip, merkezniñ er bir odası qırımtatar halqınıñ dünyasını aks ettirerek, Qırımnıñ asıl halqı olğan qırımtatarlarnıñ nasıl yaşağanı ve çalışqanını numayış etecek. Er bir köşesi ise seyircilerni Qırımnıñ Tarihiy keçmişine daldırıp, onıñ sakinleriniñ ustalığını kösterecek. “Fondımıznıñ milliy medeniyetke merağı ve diqqatı tesaduf degil, bu – bizim nizamnamemizde belgilengen maqsad ve vazifelerimizden biridir”, – dep qayd etti Riza Şevqiye ve Meclis reisi Mustafa Cemilev em de Yalta şeer başınıñ muavini Yelena Yürçenkoğa böyle alicenap işniñ amelge keçirilmesine yardımları içün teşekkür bildirdi.

Meclis reisi Mustafa Cemilev Qırımda nevbetteki, Yaltada ise birinci medeniy-etnografik merkezniñ açılmasını selâmlarken, onıñ açılmasına emegi keçken er keske minnetdarlığını bildirdi.

Meclis reisi qayd etti ki, böyle merkezlerniñ baş maqsadı qırımtatar halqınıñ medeniy variyetini saqlap qalmaq, öseyatqan nesilnen çalışmaq, halq esnaflarını ileriletmek ve milliy sanatqa bütün isteklilerni celp etmektir. Mustafa Cemilev “Dereköy” merkeziniñ teşbbüsçileri ve teşkilâtçılarına işlerinde bitmez-tükenmez ğayret tiledi.

Yalta şeer başınıñ muavini Yelena Yürçenko öz hayırlav sözünde merkezniñ açıluvı Yalta ve umumen bütün Qırım sakinleri içün büyük bayram olğanını qayd etti. “Biz bu künni aman-aman 10 yıl bekledik. Endi ise beraber yapqanlarımıznıñ neticesini köremiz. Qırımtatar medeniyeti ve milletini Yaltada pekitmek ğayesiniñ teşebbüsçilerine teşekkürlerim soñsuzdır”, – dedi YE. Yürçenko.

Duadan soñ Mustafa Cemilev ve Yelena Yürçenko merkezge resmiy kiriş temsili olğan qırmızı şeritni kestiler.

Tedbir iştirakçileri merkezniñ endi donatılğan odalarını birinci olıp seyir ettiler. Eksponatlar sergisini Zarema Menseitova açtı. Onıñ bildirgenine köre, “Dereköy” komandası qırımtatar halqı tarihınıñ ta 18-nci asırğa ait medeniyetini aks ettirgen sergini teşkil etmek maqsadında. “Çeşit bloklarda qırımtatar halqınıñ bayramları ve kündelik ömür tarzını köstergen ekspozitsiyalar yerleşecek. Merkezniñ maqsadı – bir evniñ misalinde qırımtatar halqınıñ yaşayışını köstermektir, – dey Zarema hanım.

Şunı da qayd etmeli ki, “Dereköy” merkezindeki nesnelerni sürgünlikten evel Yalatada yaşağan qırımtatar aileleri bahşış etken. Episi olıp mında 100-den ziyade eksponat olıp, olarnıñ içinde eski resimler, çeşit savut-sabalar bar.

“Dereköy” medeniy-etnografik merkezi Yalta şeeri Kiyevskaya soqağındaki cami yanında № 54 A,B evde yerleşti.