Meclis reisi Mustafa Cemilev Qırımğa kelgen Türkiyeniñ tarihiy şeerler birligi azalarını selâmladı

13 May 2013

Mayıs 12-15 künleri Türkiyeniñ Tarihi Kentler Birliğine kirgen 150-den ziyade şeer belediye başqanları yarımada ile tanış olmaq maqsadınen Qırımda bulunmaqtalar. Ziyaretniñ birinci künü mayıs 12-de Türkiye delegatsiyasınıñ azalarını Qırımtatar halqı Meclisiniñ reisi Mustafa Cemilev ve onıñ birinci muavini Refat Çubarov selâmladılar.

“Ayşe” restoranında olğan bu körüşüvde Meclis reisiniñ Türkiye boyunca mesleatçısı İsmet Yüksel ve “Bizim Qırım” halqara gençler teşkilâtınıñ reisi Abduraman Egiz iştirak ettiler.

Körüşüvden soñ Türkiye delegatsiyasınıñ azaları Meclis reisi Mustafa Cemilevnen birlikte birinci türk tilli “Terciman” gazetasınıñ tesisçisi, muarriri, mütefekkir İsmail Gasprinskiy eykeline çeçekler qoydılar. Aqmescitte bulunğan delegatsiya azaları Kebir-camide namaz qıldılar.

QHA informatsion agentligi bildirgenine köre dört künlük ziyaretnen kelgen delegatsiya Qırımnıñ tarihiy degerlikleri ve bunıñ kibi de Aqmescit, Gezlev, Bağçasaray, Aqyar, Yalta, Alupka ve Aluşta şeerlerini ziyaret etecek.

Şunı hatırlatmalı ki, Tarihiy kentler birligi Qırımnıñ tarihiy şeerlerini ögrenmek maqsadında Türkiye belediyeleri birligi tarafından meydanğa ketirilip, Qırımnıñ medeniy variyetini saqlap qaluv boyunca bayağı işler yapıp yetiştirdiler.