Meclis reisi Mustafa Cemilev Mamut Sultan qasabasınıñ sakinlerini Oraza bayramınen hayırladı

02 Sentâbr 2011

2011 senesi sentâbr 2 künü  Aqmescit rayonı Mamut Sultan qasabasınıñ sakinleri mubarek Ramazan ayı bitkenini temsil etken Oraza bayramını qayd ettiler. Bayramnı  Mamut Sultan vadiysiniñ yerli meclisi, köy Şurası, “Qırım” hayriye fondı ve bunıñ kibi de qasabanıñ iş adamları teşkil ettiler. 

Öz tarafından Mamut Sultan qasabasınıñ icadiy kollektivleriniñ ve yerli mektep em de balalar bağçasında terbiye alğan istidatlı balalarnıñ çıqışları seyircilerge unutılmaz quvançlı daqqalarnı bağışladılar.

Meclis reisi Mustafa Cemilev  Mamut Sultan qasabasınıñ sakinlerini Oraza bayramınen hayırlap,  olarğa qaviy sağlıq, aqiqiy vatanperver ve milletperver olmalarını tiledi. Mustafa Cemilev ve “Qırım” hayriye fondınıñ baş direktorı  Riza Şevqiyev qasabadaki  “Vasilök”  balalar bağçasınıñ qırımtatar gruppalarına bayram teşkilâtçıları adından televizor bağışladı. 

Şunı da ayrıca qatsd etmeli ki, bu sene mezkür bağçada daa bir gruppa açılıp, 32 bala, Mamut Sultan mektep gimnaziyasınıñ birinci sınıfına ise 23 qırımtatar talebe qabul etildi.

Qasaba sakinlerini bunıñ kibi “Qırım” hayriye fondınıñ baş direktorı  Riza Şevqiyev, Dobroye köy şurasınıñ reisi  İgor Budanov ve yerli meclis reisi  Server Seytumerov samimiy hayırlap,  sağlıq-amanlıq tilediler. Bayramda Daniyadan Qırımğa mahsus qırımtatar halqı  ve uquqqoruyıcı, Meclis reisi Mustafa Cemilev aqqında kitap azırlamaq içün kelgen jurnalist Ota Tifenbök de bulundı.