Meclis reisi Mustafa Cemilev Litvaniya baş naziri kantsleriniñ birinci muavini Remigüs Motuzas ile körüşti

26 June 2013

İyün 26 künü Milliy Meclis delegatsiyasınıñ Litvaniyağa iş ziyareti çerçivesinde Meclis reisi Mustafa Cemilev Litvaniya baş naziri kantsleriniñ birinci muavini Remigüs Motuzas ile körüşti. Körüşüvde Meclis reisiniñ birinci muavini Refat Çubarov, tışqı alâqalar bölüginiñ başı Ali Hamzin, Kiyevde yaşağan qırımtatarlar cemiyetiniñ reisi Aslan Ömer Qırımlı, Meclisniñ Litvaniyadaki temsilcisi, Litvaniya tatarlar cemiyetiniñ başı Adas Yakubauskas iştirak ettiler.

“Bizim halqlarımıznıñ vekilleri biri-birilerini yahşı añlaylar, çünki çoq asırlar devamında qırımtatar ve litvaniya halqı arasında qaviy bağ bar. Bizim Litvaniyağa ziyaretimiz – halqımıznıñ bir parçası ve aynı zamanda Litvaniya vatandaşları olğan Litvaniya tatarlarına ziyarettir, – dedi Mustafa Cemilev Remigüs Motuzasqa hıtap eterek. Soñra Mustafa Cemilev Litvaniya baş naziri kantsleriniñ birinci muavini Remigüs Motuzasqa qırımtatar halqınıñ bugünki vaziyeti ve qırımtatar halqı meselesi boyunca Halqara forumnı keçirüvge azırlıqnıñ ketişatı aqqında malümat berdi.

“Avropa Birligi Şurasında reislik yapacaq taraf olaraq sizge bir qaç teklif ve teşebbüslerimizni bildirmege ister edik. Fikrimizce olarnıñ amelge keçirilmesi halqara qırımtatar meselesine cemaatçılıqnıñ diqqatını celp eter. 2013 senesi noyabr ayında Ukraina ve Avropa Birligi arasında assotsiatsiya aqqında añlaşma imzalanması da biz içün ğayet müimdir”, – dedi Mustafa Cemilev tekliflerniñ asılını añlatırken.

“Kerçekten de, bir qaç künden soñ Avropa Birligi Şurasında Litvaniya reis yerini alacaq. Demek mümkün ki, Avropa Birliginde ükümranlıq belli bir vaqıtqa, tabiiy ki, Avropa parlamenti hadimleri ve Avropa Birligi protseduralarına muvafıq, Litvaniyanıñ eline keçecek”, – dedi Remigüs Motuzas ve devam etti: “Er angi inkişafnıñ temelinde adalet ve musaviylik printsipleri olmaq kerekligini yahşı añlaymız.

Biz, litvaniyalarğa, qırımtatar halqınıñ başına 1944 senesi tüşken felâket de yaqın. Deyerlik er bir litvaniyalı aile cezalarğa oğratıldı. Siziñ teklif ve teşebbüsleriñizni mıtlaqa baqar ve beraberlikte amelge keçirmege tırışırmız”.

Körüşüvniñ soñunda Mustafa Cemilev ve Remigüs Motuzas Milliy Meclis ve Litvaniya ükümeti arasındaki işbirlikniñ usul ve şekillerini muzakere ettiler.