Meclis reisi Mustafa Cemilev küçük oğlunıñ ailesinde yüz bergen facianı doğru aydınlatqanları içün Ukraina Kütleviy matbuat vastalarına teşekkür bildirdi

30 May 2013

“Soñki eki kün içinde (mayıs 27-28 künleri) maña onlarnen insan çañ qaqtı, men iç kimsege cevap bermedim. Telefonımnı sessiz rejimge qoydım ya da umumen qapattım, çünki meşğul edim. Berilecek sualler de aynı olğanını tahmin ettim, – dedi M. Cemilev küçük oğlu Hayser Cemilevniñ evinde yüz bergen qazadan soñ iç bir türlü izaat bermegenini añlatıp. – Jurnalistlerni meraqlandırğan suallerge tek Fevzi Edemovnıñ cenazesinden soñ, çarem ve bilgim yetkeni qadar cevap beririm, dedim.

Bu yuqusız geceler içinde 200-den ziyade yazılarnı baqıp çıqtım ve bir kereden Ukraina Kütleviy matbuat vastalarına teşekkür bildirmek isterdim. Olarnıñ ekseriyeti doğru yazğanlar. Ebet, istisnaları da bar. Lâkin er alda Ukrainada jurnalistika yeterli seviyededir”

2013 senesi mayıs 27 künü Milliy Meclis reisi, Ukraina halq deputatı Mustafa Cemilevniñ küçük oğlunıñ evinde qaza yüz berdi.

Hayser Cemilev muqaytsızlığı sebebinden ateşli silâdan Fevzi Edemovnı öldürdi.

Facia olğan künü Mustafa Cemilev onıñ ailesi tarafından taqiqat işlerini keçirüvde olduqça yardım kösterilgenini resmiy sürette bildirip taqiqat açıq ve bitaraf alınıp barılacağına ümüt beslegenini ayttı.

Mayıs 29 künü Fevzi Edemovnıñ cenazesi qılındı. Fevzi Edemovnıñ ana-babasına hıtap etken Mustafa Cemilev evinde ne var ise rahmetli Fevzi Edemovnıñ ailesi ve balalarınen paylaşmağa azır olğanını bildirdi