Meclis reisi Mustafa Cemilev İsveç Qırallığı Tışqı işler naziri Karl Bildt ile körüşti

17 Sentâbr 2011

2011 senesi sentâbr 17-de Aqmescitte olıp keçken körüşüvde bunıñ kibi de Ukrainada İsveç Qırallığınıñ Toluvekâletli ve Vefqulade Elçisi Stefan Gullgren ve Bütündünya qırımtatarlar kongressiniñ Prezidenti, Meclis reisiniñ birinci muavini Refat Çubarov iştirak ettiler.

Qırımtatar halqı Meclisiniñ reisi Mustafa Cemilevni selâmlağan , İsveç Qırallığı Tışqı işler naziri Karl Bildt şunı qayd etti ki, Yaltada keçirilgen Avropa strategiyasınıñ 8-nci forumında iştirakini planlaştırır eken, yardımcılarına Meclis reberlerinen körüşüvni teşkilâtlandırmalarını avale etti. “Körüşmekten maqsad Qırımda ve umumen qırımtatar halqınıñ ömürinde yüz bergen soñki adiselernen tanış olmaqtır”.

Meclis reisi Mustafa Cemilev Qırımda ve Ukrainada qırımtatar halqınıñ meselesini çezüv saasında siyasiy-içtimaiy vaqialarnı talil etip, İsveç naziriniñ ricasına köre 2010 senesi oktâbr ayında Qırımda yerli şuralarğa olğan saylavlarda ve Qırımtatar halqı Meclisiniñ merkeziy ve Qırım ükümetinen munasebetleriniñ hususiyetlerinde tafsilâtlıca toqtaldı.

Ukraina saylav qanunlarınıñ hususiyetlerini muzakere etüv devamında İsveç Qırallığı Tışqı işler naziri Karl Bildt diqqatnı qırımtatarlarnıñ devlet parlamentinde ve yerli ükümet organlarında vekâletligini teminlegen mahsus uquqiy mehanizmlerniñ yoqluğına celp etti.

Cenap Bildtniñ fikrince “Kiyev qırımtatarlarnıñ sesini eşitmek kerek”. Demek, Ukraina milliy azlıqlar vekilleriniñ amelde akimiyet organlarına saylanuv imkânını sıñırlağan qarışıq saylav sistemasını ğayrıdan baqmalı.

Mustafa Cemilev ve Karl Bildt Qırımtatar halqınıñ öz Vatanında aq-uquqlarını ğayrıdan tiklev, onıñ Ukrainrada telükesizligini teminlev meselesi boyunca halqara forumğa azırlıq ketişatını muzakere ettiler Subetke qoşulğan Ukrainada İsveç Qırallığınıñ Toluvekâletli ve Vefqulade Elçisi Stefan Gullgren 2011 senesi oktâbr 5 künü Qırımtatar halqı Meclisiniñ Ukrainada faaliyet köstergen halqara teşkilâtlar ve elçiliklerniñ reberlerinen olacaq körüşüvge qatılıp, Halqara forum köntseptsiyasınıñ muzakeresinde iştirak etmek niyetini tasdiqladı.