Meclis reisi Mustafa Cemilev iş ziyaretinen Litvaniyağa yol aldı

21 Oktâbr 2013

Meclis reisi, Ukraina halq deputatı Mustafa Cemilev oktâbr 21-23 künleri Litvaniyanıñ Vilnüs şeerinde iş ziyaretinen bulunmaqta.

Üç künlük iş ziyareti çerçivesinde Litvaniya baş naziri Algirdas Butkâviçüs, Tış işleri naziri Linas Linkâviçüs, Litvaniya cumhuriyeti seyminiñ azaları, bunıñ kibi de Litvaniyanıñ sabıq reisi, Avropa parlamentiniñ deputatı Vitautas Landsbergis, Türkiyeniñ Litvaniyadaki Elçisi Akin Algan, Ukrainanıñ Litvaniyadaki Elçisi Valeriy Jovtenko ve litvaniyalı disssidentler, sabıq siyasiy mahbüslernen körüşüvler planlaştırıla.

Ziyaret devamında Mustafa Cemilev Avropa Birliginiñ Kenişletüv ve Avropanıñ eyiqomşucılıq siyaseti meseleleri boyunca komissar Ştefan Füleniñ qırımtatar problemi çezilmesine dair teşebbüsi aqqında malümat berecek.

Bunıñ kibi de Vilnüste Meclis reisi M. Cemilev ELTA-ELTA “Lietuvos naujienų agentūra” haberler agentliginiñ matbuat merkezinde matbuat konferentsiyası bermesi közde tutula.

Meclis reisinen beraber Litvaniyada Meclis tışqı alâqalar bölüginiñ başı Ali Hamzin, Meclisniñ Litvaniyadaki temsilcisi, Litvaniya tatarlar cemiyetiniñ başqanı Adas Yakubauskas ve Ukraina halq deputatı Mustafa Cemilevniñ iqtisadiy meseleler boyunca yardımcısı Rustem Ümerov bulunmaqtalar.