Meclis reisi Mustafa Cemilev Halqara qaçaqlar kününe bağışlanğan «Yañı evim – Ukraina» fotosergisiniñ açılışında iştirak etti

21 Iyün 2013

Meclis başqanı, Ukraina halq deputatı Mustafa Cemilev Halqara qaçaqlar kününe bağışlanğan ve Birleşken Milletler Teşkilâtı ile birlikte İnsan aqları, milliy azlıq ve milletlerara munasebetler meseleleri boyunca halqara komitet tarafından teşkilâtlandırılğan “Yañı evim – Ukraina” fotosergisi açılışında iştirak etti. Qaçaqlarnıñ Ukrainadaki vaziyetini aks ettirgen fotosergi 2013 senesi iyün 20 künü Kiyevde açıldı.

Şunı qayd etmeli ki, ekspozitsiyanıñ bir qısmı Norvegiya erbabı ve diplomatı, Nobel mukâfatınıñ saibi ve Qaçaqlarnıñ işleri boyunca ilk Aliy komissar Fritof Nansenge bağışlandı. Belli ki, Meclis reisi, Ukraina halq deputatı Mustafa Cemilev “qırımtatar halqını Vatanğa qaytaruv işine sadıqlığı içün” ve büyük hızmetleri içün 1989 senesi BMT Qaçaqlarnıñ işleri boyunca Aliy komissarlıq idaresinden Nansen mukâfatını alğan Ukrainada yekâne insandır.

Sergi açılışında çıqaşta bulunğan Ukraina Yuqarı Şurasınıñ İnsan aqları ve milletlerara munasebetler boyunca komitetniñ başı Valeriy Patskan dedi ki, qaçaqlarnıñ işlerini qanuniy tertipke ketirmek içün komitet elinden kelgenini yapar.

“Biz, qanunâratıcılar, ögünde qaçaqlarnıñ işlerini qanuniy tertipke ketirüv boyunca müim meseleler turmaqta. Şunıñ içün de komitetimiz BMT Qaçaqlarnıñ işleri boyunca Aliy komissarlıq idaresi ile birlikte qanuniy aktlarnı işley ve tez arada biz olarnı Yuqarı Şuranıñ muzakeresine qoyarmız, – dedi V. Patskan.

Fotosergi açılışında bunıñ kibi de BMT Qaçaqlarnıñ işleri boyunca Aliy komissarlıq idaresiniñ Beyaz Rusiye, Moldova ve Ukrainadaki regional temsilcisi Oldrih Andrısek, Norvegiyanıñ Ukrainadaki vefqulade ve toluvekâletli elçisi Yon Elvedal Fredriksen ve Avropa Birliginiñ Ukrainadaki vekâletligi başınıñ muavini Mariya Yurkova, Ukraina Yuqarı Şurasınıñ İnsan aqları ve milletlerara munasebetler boyunca komitetniñ başı Valeriy Patskan, bunıñ kibi de Norvegiya Qırallığınıñ Ukrainadaki Vefqulade ve toluvekâletli Elçisi iştirak ettiler.