Meclis reisi Mustafa Cemilev Çehiya Cumhuriyeti Tışqı işler naziriniñ birinci muavini Yirji Şnayder ile körüşti

10 Mayıs 2011

2011 senesi iyün 10 künü Meclis reisi Mustafa Cemilev Çehiya Cumhuriyeti Tışqı işler naziriniñ birinci muavini Yirji Şnayder ile körüşti.

Bağçasarayda 2011 senesi iyün 10 künü Turistik-informatsion merkezniñ tantanalı açılışında beraber iştirak etken Qırımtatar halqı Meclisiniñ reisi Mustafa Cemilev ve Çehiya Cumhuriyeti Tışqı işler naziriniñ birinci muavini Yirji Şnayderniñ körüşüvinde Çehiya Cumhuriyetiniñ Ukrainadaki elçiligi işleriniñ vaqtınca yöneticisi Vitezslav Pivonko, Çehiya Cumhuriyetiniñ Ukrainadaki elçiliginiñ siyasiy meseleler boyunca mesleatçısı Lüboş Veselı, Çehiya Tışqı işler nazirliginiñ Şarqiy Avropa departamentiniñ direktorı Martin Kasatka, Meclis reisiniñ muavini Ahtem Çiygoz, tışqı alâqalar bölüginiñ başı Ali Hamzin ve Bağçasaray rayon devlet memuriyetiniñ reisi İlmiy Ümerov de iştirak ettiler.

Bir çoq meseleler boyunca alıp barılğan subet devamında Mustafa Cemilev ve Yirji Şnayder Ukrainada içtimaiy-siyasiy ceryan ve Qırımda qırımtatar halqınıñ vaziyetinen bağlı meseleler hususında fikir paylaştılar.

Bunıñ kibi de Qırımtatar halqı Meclisiniñ reisi Mustafa Cemilev Çehiya Cumhuriyeti Tışqı işler naziriniñ birinci muavini Yirji Şnayder cenapqa Qırımtatar halqınıñ öz Vatanında aq-uquqlarını ğayrıdan tiklev, onıñ Ukrainada inkişaf etmesi ve qorçalanması boyunca ötkerilecek halqara forumğa Meclis tarafından yapılğan azırlıq aqqında tarif etti.

Körüşüv iştirakçileri şunı ayrıca qayd ettiler ki, qırımtatar halqınıñ aq-uquqlarını ğayrıdan tiklevge ait meselelerniñ çezimi cemiyette demokratiya, özara sayğı-ürmet printsipleriniñ tesis etilmesinen bağlıdır. Buña ise birinci nevbette Avropa Birligi ve Ukraina işbirligi çerçivesinde Avropa Birligi devletleriniñ Qırımda amelge keçirgen gumanitar leyhalar siltem berirler.