Meclis reisi Mustafa Cemilev Bişkek añlaşmasınıñ müddetini daa 10 yılğa devam ettirmekni talap ete

11 April 2013

Aprel 11-de Qırım Yuqarı Şurasında Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitetniñ seyyar toplaşuvı olıp keçti. Körüşüv Komitetniñ milliy siyaset, tamır halqlarnıñ ve milliy azlıqlarnıñ aqları boyunca bölüginiñ başı, Meclis reisi Mustafa Cemilevniñ teşebbüsi ile oldı.

Toplaşuada çıqışta bulunğan Mustafa Cemilev “Sürgün etilgen şahıslar, milliy azlıqlar ve halqlarnıñ aqlarını tiklevnen bağlı meseleler boyunca añlaşma” yani Bişkek añlaşmasınıñ müddeti bitmek üzre olğanını hatırlattı.

Malüm ki, 1992 senesi oktâbr 9-da Ukraina devletiniñ teşebbüsinen Bişkekte bu añlaşmanı MDB (mustaqil devletler birligi”) devletleri imzalağan ediler.

“Bu pek müim vesiqadır, Bişkek añlaşmasındaki epsi 12 maddeniñ eda olunması sürgün etilgenlerniñ avdetini ve yerleşmesini bayağı yengilleştirir edi. Amma, teessüf ki bu añlaşmanı imzalağan bazı devletler, şu cümleden Rusiye onı tanımadı, tanığanlarnıñ bazıları ise añlaşma talaplarına aslı da riayet etmediler, – dep qayd etti M. Cemilev. – 2003 senesi Ukraina Yuqarı Şurası bu añlaşmanıñ müddetini daa 10 yılğa sozdı. Çünki qaytuv ceryanı daa soñuna kelmedi, añlaşma müddeti ise mayıs ayında bitecek. Demek, Ukraina Yuqarı Şurası añlaşmanıñ müddetini daa 10 yılğa devam ettirmeli”.