Meclis reisi Mustafa Cemilev Bağçasaray rayonı sakinlerini qabul etti

17 December 2012

17 dekabr künü Meclis reisi, Ukraina halq deputatı Meclis ofisinde Mustafa Cemilev Bürlük (Vilino) ve Alma Tamaq (Pesçanoye) köy şuralarınıñ yerlerini “Agrofirma Krım” şirketi tarafından zapt etilgeni aqqında oña muracaatını şahsen ketirgen Bağçasaray rayon sakinlerini qabul etti. Muracaatnı Bağçasaray rayon sakinleri, bunıñ kibi de akimiyet ve yerli öz-özüni idare etüv organı vekilleri, deputatlar imzalağanlar.

600 imzanen pekitilgen mezkür Muracaat bunıñ kibi de Ukraina Prezidenti. Nazirler Kabineti, Ukraina Yuqarı Şurasınıñ İnsan aqları boyunca vekâletlisi. Ukraina Baş prokuraturasına, Qırım Yuqarı Şurası ve Nazirler Şurasına da yollanıldı.

Paycılar teşebbüsçi gruppası vekilleriniñ aytqanına köre 2012 senesi dekabr 6 künü Bürlük köyünde rayon sakinleriniñ toplaşuvı olıp, onda paycılar ve “Krım” agrofirması yolbaşçıları arasında topraq içün çıqqan dava meselesi baqılğan.

“Krım” agrofirması Bürlük (Vilino) ve Alma Tamaq (Pesçanoye) köy şuraları köy hocalığını alıp barmaq içün topraq ayıruv aqqında alğan qararnıñ lâğu etilmesini 8 yıldan berli mahkeme arqalı talap ete. Biz mahkeme tartışmaları ve “yol cenklerinden” bıqtıq artıq. Bizge nisbeten yapılmaqta olğan aqsızlıqnı toqtatmañıznı rica etemiz”, – dep muracaat ettiler Ukraina halq deputatı Mustafa Cemilevge paycılar.

Bağçasaray rayon sakinleriniñ haber etkenine köre olarnıñ devlet ve cumhuriyet organlarına yollağan bütün muracaatları ve mektüpleri mına endi 8 yıldan berli cevapsız qalmaqta. “Krım” agrofirması bizim topraqlarımızda iç bir türlü iş yapmay, yalıñız olarnı çekip almağa istey. Bizim meselesiz endi çoqtan siyasiy tüs aldı, çünki mesele çezimi artında vazifedar şahıslar turmaqta, – deyler eminliknen topraq saipleri.

Qırımtatar halqı Meclisiniñ reisi, Ukraina halq deputatı Mustafa Cemilev Muracaatnıñ keregi kibi baqılmasını işandırıp, öz tarafından Ukraina devlet hadimlerinen körüşmege ve davanıñ adaletli çezilmesine tırışacağına vade etti.