Meclis reisi Mustafa Cemilev Anqara derneginde toplanğan paralarnı Yasmin Mamutova ve Sevil Ahmedovanıñ tedaviylenmesine berdi

09 October 2012

Oktâbr 9 künü Meclis reisi Mustafa Cemilev eki ağır hasta balaçıqlar Yasmin Mamutova ve Sevil Ahmedovanıñ ana-babalarına Qırımtatarlar yardımlaşma ve medeniyet dernekleriniñ umumiy merkezi (Anqara) tarafından toplanğan paralarnı berdi. Keçken aynıñ soñunda umumiy merkezde teşkilâtlandırılğan hayriye aktsiyası devamında toplanğan paralar Qırımğa yollanıldı. Qırımtatarlar yardımlaşma ve medeniyet dernekleriniñ umumiy merkezi (Anqara) başı Tuncer Qalqaynıñ ricası boyunca eki sabiyçikniñ ameliyatına toplanğan maddiy yardımnı Qırımtatar halqı Meclisiniñ reisi Mustafa Cemilev taqdim etti.

Altı aylıq Yasmin Mamutovanıñ babası Ervin Mamutov 4.940 amerikan dolları miqdarında yardım aldı. Yasmina Mamutovağa ameliyat Belçikada yapılacaq. Balanıñ babası aytqanına köre aile Belçika klinikasına davetnameni aldı. Ameliyat şu yılnıñ oktâbr 15-nde yapılacaq. Bugünde-bugün balanıñ ana-babası Belçikağa yönemek içün vesiqalarını azırlamaqtalar. Qızçıqnıñ anası ve babası ameliyat yahşı keçecegine ümüt etip, olarğa yardımda bulunğanlarnıñ episine samimiy minnetdarlığını bildirdiler.

Beş aylıq Sevil Ahmedovanıñ ana-babası özleri kelip olamadılar, çünki bu künlerde olar ameliyattan keçken balanen beraber Kiyevde Şalimov adına klinikada bulunalar. Sevil Ahmedovanıñ tizesi Zarife Çobanovanıñ haber etkenine köre Sevilge anasınıñ cigeri qoyuldı.

“Ameliyat bir qaç kün evelsi yapılıp, bala pnevmoniyağa oğradı. Bugün Sevilniñ sıcağı normağa kelgen. İnşalla, balamız tüzelir”, – dep ikâye ete Zarife Çobanova.

Sevil Ahmedova içün Türkiyeli semetdeşlerimiz 2000 amerikan dolları berip yibergenler. Zarife Çobanova qızçıqnıñ ana-babası adından er keske minnetdarlığını bildirdi: “Alla er kesten razı olsun, yardım bergen er bir insanğa sağlıq tileyim”, dedi Zarife hanım Meclis reisi Mustafa Cemilevnen subetleşkende.

Meclis reisi Mustafa Cemilev tez arada Sevil Ahmedova ve Yasmin Mamutovanen tanış olmaq niyetinen paylaştı, çünki balalarnıñ sağlığı tüzelecegine emin. Bunıñ kibi de reis böyle hayriye aktsiyaları devam etecegi, şu cümleden eñ çoq sayılı qırımtatar diasporası yaşağan Türkiyede de olacağını ayttı.

Meclis reisiniñ sözlerine Türkiyeden hayriye yardım berilgen vaqıtta yanında bulunğan onıñ Türkiye meseleleri boyunca mesleatçısı İsmet Yüksel de qoşuldı.