Meclis reisi Mustafa Cemilev Almaniyanıñ Ukrainadaki Elçisi Kristof Vayl ile körüşti

20 September 2012

2012 senesi sentâbr 20 künü Meclis reisi, Ukraina halq deputatı Mustafa Cemilev Almaniyanıñ Ukrainadaki Vefqulade ve Toluvekâletli Elçisi Kristof Vayl ile körüşti. Qırımtatar halqınıñ Qırımda bugünki alı, yarımada tamır halqınıñ milliy özgünligini saqlav, milliy tasil inkişafı, Aqmescitte Cuma camisiniñ qurucılığı, Ukraina ve Qırımda içtimaiy-siyasiy vaziyet Mustafa Cemilev ve Kristof Vayl subetiniñ baş mevzuları oldı.

Cenap elçi Meclis yolbaşçıları Kiyevde sentâbr 18 künü keçirgen körüşüvde şahsen iştirak etip olamağanını teessüf ile bildirip, şularnı qayd etti: “Eminim ki, Qırımtatar halqınıñ aqlarını ğayrıdan tiklev meseleleri boyunca halqara forum keçirilmesi hususında fikir paylaşuv qoyulğan maqsadnıñ kerçekleşmesi yolunda daa bir adım olur”.

Subet devamında taraflar bunıñ kibi de Ukrainanıñ “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanunını ekinci oquvda qabul etüv istiqballerini muzakere ettiler. Belli ki mezkür qanun leyhasınıñ müellifi Meclis reisi, Ukraina halq deputatı Mustafa Cemilevdir. Meclis reisiniñ fikrince qanun kesen-kes tek parlament seçimlerinden soñ Ukraina Yuqarı Şurasınıñ yañı erkânı şekillengende qabul etilir.

Qırımtatar halqı inkişafınıñ kelecegi aqqında aytırken Mustafa Cemilev şunı da qayd etti ki, qırımtatarlar kendilerini tek mustaqil ve bütün ukrain devleti içersinde körmekteler.

Öz nevbetinde Kristof Vayl qırımtatar halqı ve umumen Ukraina vatandaşları öz milliy özgünliklerini saqlayabileceklerine ümüt ete.

Körüşüvde Meclis reisiniñ yardımcısı Aleksey Skorik de iştirak etti.