Meclis reisi Mustafa Cemilev 69 yaşında

13 November 2012

Öz doğğan kününi Meclis reisi soy-aqrabaları, dostları ve yaqınları, meslekdeşlerinen beraber Aqmescitteki “Ayşe” restoranında qayd etti.

Şu künü Mustafa Cemilevniñ adına çoqtan-çoq hayırlav mesajları ve telegrammalar keldi. Cümleden, “Batkivşçina” Birleşken muhalifet keñeşiniñ reisi Arseniy Yatsenük, Ukraina Prezidentiniñ Qırımdaki daimiy temsilcisi Viktor Plakida ve onıñ muavini İbraim Mamutov, Ukraina Prezidentiniñ mesleatçısı, Ukraina Prezidenti Memuriyetiniñ siyasiy-içtimaiy meseleleri boyunca baş idaresiniñ yetekçisi Anna German, Qırım Nazirler Şurası reisiniñ muavini Georgiy Psaröv hayırladılar. Bunıñ kibi de Meclis reisini doğğan künü munasebetinen dünyanıñ çeşit köşelerinde yaşağan dostları ve meslekdeşleri, ukrain siyasetçileri, elçiler telefon vastasınen tebriklediler.

Öz hayırlavlarını Qırım Nazirler Şurası reisiniñ muavini Aziz Abdullayev, “Alraid” birleşmesiniñ Qırımdaki bölüginiñ başı doktor Muhammad Taha, Kezlev şeer yolbaşçısı Anatoliy Danilenko yolladılar.

Öz nevbetinde Mustafa Cemilev onı hayırlağanlarnıñ episine teşekkür bildirip, er keske sağlıq ve muvafaqiyet tiledi.