Meclis reisi Mustafa Cemilev 68 yaşçını toldurdı

14 Noyabr 2011

2011 senesi noyabr 13 künü Qırımtatar halqı Meclisiniñ reisi, Ukraina halq deputatı Mustafa Cemilev 68 yaşçını toldurdı.

Öz doğğan kününi Mustafa Cemilev aile azaları, soy-aqrabaları ve dostları, zenaatdaşlarınen birlikte qayd etti.

Bu künü Mustafa Cemilevniñ adına çoqtan-çoq hayırlav mektüpleri ve telegrammalar keldi.

Cümleden, Meclis reisini Ukraina Prezidenti Viktor Yanukoviç hayırladı.

“Ürmetli Mustafa! Sizni doğğan künüñiznen samimiy hayırlap, Sizge qaviy sağlıq, aileviy baht, Ukraina devleti oğrunda areketleriñizde tükenmez ğayret ve yañı yeñişler tileyim. Eminim ki, Siziñ professional tecribeñiz, semetdeşlerimizniñ problemlerini añlağanıñız halq vekili vazifesini eda etüviñizde yardımcıñız olur. Sizge baht ve eyilik tileyim”, – denile Ukraina Prezidentiniñ hayırlavında.

Ukraina Yuqarı Şurasınıñ reisi Vladimir Litvin, Yuqarı Şuranıñ bir çoq deputatları, bunıñ kibi de “Front zmіn” partiyasınıñ lideri Arseniy Yatsenük ve “UDAR” partiyasınıñ yetekçisi Vitaliy Kliçko, dünyanıñ çeşit köşelerinde yaşağan arqadaşları ve meslekdeşleri, ukrain siyasiy alanınıñ vekilleri, bunıñ kibi de bir sıra elçiler belli uquqqoruyıcı Mustafa Cemilevni doğğan kününen telefon vastasınen hayırladılar.
 

Öz hayırlavlarını Ukraina Prezidenti Qırımdaki Daimiy temsilcisiniñ vazifesini eda etici Viktor Plakida, Qırım Nazirler şurası reisiniñ muavini Aziz Abdullayev, Qırım Yuqarı Şurası reisiniñ muavini Grigoriy İoffe, “Alraid” birleşmesiniñ başı , doktor İsmail Qadı, “Alraid” birleşmesi Qırım teşkilâtınıñ reisi , doktor Muhammad Taha yolladılar.

Öz nevbetinde Mustafa Cemilev onı hayırlağanlarnıñ episine teşekkürlerini bildirdi.