Menu 
Meclis reisi M.Cemilevniñ Türkiye Cumhuriyetine ziyareti
12 Avgust 2011
Delegatsiya erkânına Meclis reisiniñ Türkiye ile alâqalar boyunca yardımcısı İsmet Yüksel ve Kiyevde qırımtatar cemiyetiniñ reisi, M. Cemilevniñ yardımcısı Aslan Ümerov da kirdiler.
Avgust 8-de İstanbul ava limanında delegatsiyanı Türkiye Cumhuriyeti Nazirler şurası yanında Yurt tışında yaşağan türklerniñ işleri baqanlığınıñ reberleri, İstanbul qırımtatar medeniy ve yardımlaşma derneginiñ başı Celâl İçten, qırımtatar medeniyet ve yardımlaşma derneginiñ Ankaradaki umumiy merkez azaları qarşılap aldılar.
Avgust 9 künü Meclis reisi Mustafa Cemilevni Türkiye Cumhuriyeti Nazirler şurası yanında Türklerniñ işleri baqanı Kemal Yurtnaç qabul etti. Türkiye Cumhuriyeti Nazirler şurası yanında Türklerniñ işleri baqanınıñ muavini Mehmet Köse ve baqanlıq hadimleri de bulunğan şu körüşüvde Baqanlıq faaliyetine ve Qırımda amelge keçirile bilecek leyhalarğa ait meseleler muzakere etildi.
Kemal Yurtaç ve Mehmet Köse ile beraber Qırım delegatsiyasını Türkiye Cumhuriyeti Baş naziriniñ TİKA, Din ve Yurt tışında yaşağan türklerniñ işleri İdareniñ başı Bekir Bozdağ da qabul etti. Mustafa Cemilev baş nazir muavinine yañı vazifede muvafaqiyetler tiledi. Körüşüv devamında Türkiye Cumhuriyetiniñ Qırımda amelge keçirgen leyhaları aqqında laqırdı etildi. Bozdağ Türkiye Cumhuriyeti kelecekte de öz tarihiy vatanında yerleşeyatqan qırımtatar halqına yardım etmekni devam etecegini işandırdı.
Aynı şu künü Meclis reisi Mustafa Cemilev Türkiye Cumhuriyeti İlim, sanayı ve tehnologiya naziri Nihat Ergün ile körüşti. Körüşüvde Bağçasarayda sanayı parkınıñ qurucılığı meselesi muzakere olundı. Ergün bu meselede yardımcı olmaqnı işandırıp, başta leyhanı azırlamaq ve işçi gruppasını teşkil etmek kerekligini qayd etti.
Türkiyege iş ziyareti çerçivesinde Mustafa Cemilev bunıñ kibi de TİKA idaresinde de bulundı. TİKA başqanı Serdar Çama resmiy ziyaretnen Afrikada olğanı sebebinden delegatsiyanı TİKA başqanınıñ yardımcıları ve ekspertler qabul ettiler. Taraflar TİKA Qırımda ömürge keçirgen ve keçirmekni planlaştırğan leyhalarnı baqtılar. Bunıñ kibi de meskenge muhtac qırımtatarlarnı evlernen teminlev programmasını canlandırmaq, TİKAnıñ Ukrainada ofisini resmiyleştirmek, yañı milliy mekteplerni qurmaq, Borçoqraq qasabasındaki milliy mektep qurucılığını soñuna yetkizmek ve Büyük Cuma Cami qurucılığını başlamaq meseleleri de muzakere etildi.
Bundan da ğayrı Meclis reisi M.Cemilev Türkiye palata ve birjalar birliginiñ reisi Rifat Hisarciqlıoğlunen körüşti. Subet vaqtında taraflar Ukrainada çalışqan, Ukrainağa yatırımlar yapmaq istegen iş adamlarınıñ vaziyeti, Qırım Müendislik-Pedagogika Universitetiniñ studentleri içün yataqhane qurucılığı aqqında aytıldı.
Şu künü aqşam Qırım delegatsiyası Türkiye Cumhuriyeti Nazirler şurası yanında Yurt tışında yaşağan türklerniñ işleri baqanlığı teşkil etken iftarda bulundılar. İftarda Türkiye Cumhuriyeti baş naziriniñ muavini Bekir Bozdağ, Türkiye qırımtatarları medeniyet ve yardımlaşma dernegi reisiniñ vekili ,Tuncer Kalqay iştirak ettiler.
Avgust 10 künü Meclis reisi Mustafa Cemilev Türkiye cumhuriyeti Emek ve içtimaiy qoruv naziri Faruq Çeliknen körüşti. Körüşüvde taraflar qırımtatar halqınıñ bugünki vaziyeti ve öz vatanına qaytayatqan ve yerleşeyatqan qırımtatarlarına Türkiye Cumhuriyeti tarafından destek istiqballerine ait meseleler muzakere etildi. Körüşüvde Qırımtatar halqı Meclisiniñ Türkiyedeki temsilcisi Zafer Qaratay, Türkiye qırımtatarları medeniyet ve yardımlaşma dernegi Ankaradaki umumiy merkez reisiniñ muavini Namıq Kemal Bayar ve Türkiye Cumhuriyeti Nazirler şurası yanında Yurt tışında yaşağan türklerniñ işleri baqanı Kemal Yurtnaç iştirak ettiler.
Aynı şu künü delegatsiya Türkiye Cumhuriyeti Din işleri idaresi ve Tışqı işler nazirligini ziyaret ettiler. Körüşüv devamında Din işleri idaresiniñ başı Mehmet Görmeznen Ukrainada faaliyet köstergen temsilciliginiñ işleri, qırımlı gençlerni Türkiyede oqutuv, Cuma cami qurucılığı kibi meseleler baqıldı. Körüşüvden soñ delegatsiya azaları Diyanet işleri idaresine yaqın yerde 6 biñ adamnı sığdıracaq cami qurucılığında da bulundılar.
Tışqı işler nazirliginde Qırım delegatsiyası tışqı siyaset idaresiniñ başı Ahmet Davutoğlunen körüşti. Körüşüvde Qırımtatar halqınıñ aq-uquqlarını ğayrıdan tiklev meseleleri boyunca halqara forum keçirilmesi, TİKAnıñ Ukrainada ofisini resmiyleştirilmesi kibi meseleler baqılıp, olarnı Ukraina Prezidenti Viktor Yanukoviçniñ küzde Türkiyege resmiy ziyareti vaqtında kötermek aqqında aytıldı. .
Şu künü aqşam delegatsiya Türkiye qırımtatarları medeniyet ve yardımlaşma dernegi Ankaradaki umumiy merkeziniñ reisi Ahmet İhsan Qırımlı teşkil etken iftarda iştirak ettiler.
11 avgust künü Qırımtatar halqı Meclisiniñ reisi Mustafa Cemilev Qırımğa qaytıp keldi.
