Meclis reisi M.Cemilev Türkiye Cumhuriyetiniñ Ukrainadaki yañı elçisinen körüşti

08 Dekabr 2011

Qırımtatar halqı Meclisiniñ reisi, Ukraina halq deputatı M.Cemilev 8 dekabr künü Kiyevde Türkiye Cumhuriyetiniñ Ukrainadaki yañı elçisi Mehmat Samsar ile körüşip, Qırımdaki vaziyetni, qırımtatarlarnıñ esas problemleri.

Meclisniñ muhtariyattaki yañı ükümet yolbaşçısınen munasebetleri, Ukraina Prezidenti Viktor Yanukoviçniñ Türkiyege resmiy ziyaretini muzakere ettiler.

Bundan da ğayrı Meclis reisi M.Cemilev ve Türkiye Cumhuriyetiniñ Ukrainadaki yañı elçisi M. Samsar ağımdaki yılnıñ yanvar ayında Meclis reisiniñ Türkiye baş naziri R.T. Erdoğan ile körüşüvinde baqılğan meselelerge de diqqat ayırdılar.

Mustafa Cemilev hatırlattı ki, Trükiye ükümetiniñ başı ile qonuşuv devamında Türkiye tarafından qırımtatarlarnıñ bazı sotsial problemleriniñ çezimine, şu cümleden Qırımda mektep, mesken evler, medeniy merkez ve diger obyektlerniñ qurucılığına yardım etüv boyunca evelden muzakere olunğan programmalarnıñ kerçekleştirmek istiqballeri aqqında söz yürsetilgen edi.

Türkiye elçisi Ukraina Prezidenti Viktor Yanukoviçniñ Türkiyege resmiy ziyaretiniñ neticelerine yekün çekildikten soñra Qırımnı ziyaret etmek niyeti aqqında bildirdi.

Körüşüvde Meclis reisiniñ yardımcıları Aleksey Skorik ve Aslan Ümerov, bunıñ kibi de Türkiye Cumhuriyetiniñ Ukrainadaki elçilikniñ kâtibi Berk Ege iştirak ettiler.