Meclis reisi M.Cemilev Qırım Baş naziri A.Mogilövnen körüşti

10 Noyabr 2011

2011 senesi noyabr 9 künü Qırımtatar halqı Meclisiniñ reisi, Ukraina halq deputatı Mustafa Cemilev, onıñ birinci muavini, Qırım Yuqarı Şurasında “Qurultay-Ruh” fraktsiyasınıñ başı Refat Çubarov ve Qırım Nazirler Şurasınıñ yañı tayinlengen reisi Anatoliy Mogilöv, Ukraina halq deputatı, Ukraina Yuqarı Şurasınıñ Qırım Muhtar Cumhuriyeti meseleleri boyunca muvaqqat komissiyasınıñ başı Böris Deyçniñ iş körüşüvi olıp keçti.

Körüşüv iştirakçileri acele çezilmesi zarur meselelerni ve olarnıñ çezimine Qırım Nazirler Şurası ve Ukraina halq deputatlarınıñ areketlerini celp etüv meselelerini muzakere ettiler.

Qırımtatar halqı Meclisiniñ reisi, Ukraina halq deputatı Mustafa Cemilev öz subetdeşleriniñ diqqatını qırımtatar halqınıñ aq-uquqlarını ğayrıdan tiklenilmesini temin etken meseleler ve Ukraina Devlet bücetiniñ 2012 senesine leyhasına, hususan Qırımdan milliy mensüpligine köre sürgün etilgen qırımtatarlar ve digger millet vekilleriniñ qaytarılması ve yerleştirilmesine ayırılması közde tutulğan sermiyalarğa ait qısmına, celp etti. Bunıñ kibi de o, Qırımdaki dinlerara munasebetlerge, yarımada sakinlerini topraqnen adaletli teminlevge Meclisniñ noqtai-nazarını beyan etti.

Qırım Nazirler Şurasınıñ reisi Anatoliy Mogilöv toplanıp qalğan problemlerni çezmek içün akimiyet organları ve yarımadadaki siyasiy ve cemaat teşkilâtları vekilleri arasındaki daimiy dialognıñ müimligini qayd etti.

Ukraina Yuqarı Şurası Muvaqqat komissiyasınıñ reisi Böris Deyç reberligi altındaki komissiyanıñ Qırım inkişafı meseleleriniñ qanuniy teminlenmesi oğrunda faaliyeti aqqında malümat berdi.

Körüşüvniñ soñunda onıñ iştirakçileri kelecekte de Qırımnıñ inkişafını ve yarımadada barışıqlıqnı teminleycek meselelerniñ öz vaqtında çezmek maqsadında dialognı devam etmek fikirini bildirdiler.