Meclis reisi M.Cemilev Qırım baş naziri A.Mogilevnen körüşti

28 Dekabr 2011

2011 senesi dekabr 28 künü Qırımtatar halqı Meclisiniñ reisi, Ukraina halq deputatı Mustafa Cemilev ve onıñ birinci muavini, Qırım Yuqarı Şurasınıñ deputatı Refat Çubarov Qırım Nazirler Şurasınıñ reisi Anatoliy Mogilevnen körüştiler.

Qırım Nazirler Şurası reisiniñ iş odasında olğan körüşüv devamında taraflar çezimi devlet reberleri ve Qırım icra akimiyeti yolbaşçılarınıñ bivasta diqqatını talap etken meselelerni muzakere ettiler.

Körüşüv iştirakçileri qırımtatarlar toplu yaşağan qasabalarnıñ vaziyetinen bağlı meseleler – mektep, tibbiy müessise, yol, gaz ve suv olmağanını ayrıca qayd ettiler.

Bu esnada Qırım Nazirler şurasınıñ reisi Anatoliy Mogilev ve Qırımtatar halqı Meclisiniñ reisi Mustafa Cemilev 2012 senesine Ukraina Devlet ve Qırım cumhuriyet bücetlerinde sürgünlikten qaytqanlarnı yerleştirüv programmasına pek az sermiya ayırılğanını esapqa alğanları alda 2012 senesine Qırım bücetine ileride qoşumcalar kirsetilgende qaytmaq imkânlarını da baqtılar.

Bunıñ kibi de körüşüv iştirakçileri qırımtatarlar toplu yaşağan qasabalarnıñ abadanlaştırılmasına, cümleden çoqqatlı evler, mektep ve mektepkece bala müessiseleriniñ qurucılığına tıştan yatırımlarnı celp etüv yollarını da muzakere ettiler.

Körüşüv vaqtında Qırımda dinlerara munasebetleri, yaşlar arasından professional kadrlarnı azırlav ve devlet icra organlarında qırımtatarlarnıñ vekâletligini teminlev meselelerine de diqqat ayırıldı.

Çezimini beklegen müim meselelerniñ muzakeresine yekün çekken Mustafa Cemilev Anatoliy Mogilövğa Ukraina Prezidenti ve qırımtatar halqı arasında devamlı işbirlikni meydanğa ketirüv boyunca konkret tekliflerini bildirdi.