Meclis reisi M.Cemilev Felestinniñ Ukrainada Elçisi Mohammed Al-Asaadnı qabul etti

06 Sentâbr 2011

2011 senesi sentâbr 5 künü  Qırımtatar halqı Meclisiniñ reisi Mustafa Cemilev Meclis ofisinde  Felestinniñ Ukrainadaki Vefqulade ve Vekâletli elçisi Mohammed Al-Asaadnı qabul etti.

Qırımda iş ziyaretinen bulunğan nufuzlı musafirniñ yanında konsul Daud Al-Alijbur, Felestinniñ Ukrainada elçihanesiniñ birinci mesleatçısı Mhanna Saami ve Qırımdaki çetelli studentler birleşmesiniñ reisi Kaud Diya da bar edi.

Körüşüvde Meclisniñ tışqı alâqalar bölüginiñ müdiri Ali Hamzin ve Meclis Kâtibiyetiniñ başı  Zair Smedlâyev de iştirak ettiler.

Subetniñ iştirakçileri Ukraina ve Qırımda bugünki içtimaiy-siyasiy vaziyetni muzakere ettiler. Felestinli elçiniñ malümatına köre Ukraina ve Qırımda çoqsayılı felestin diasporası yaşay, ukrain ve Qırım aliy oquv yurtlarında Felestin devletiniñ gençleri tasil almaqtalar. Felestin elçisi Mohammed Al-Asaad bunıñ kibi Meclis reberlerini al-azırda Felestinde yüz bermekte olğan adiselernen haberdar etip, felestin muhtariyatınıñ zemaneviy siyasiy akimiyetiniñ hususiyetlerini qayd etti. Elçiniñ aytqanına köre  onda “Fath” firqası ve “Hamas” areketi yetekçilik yapalar.  2011 senesi sentâbr ayında BMT Telükesizlik Şurasınıñ sessiyasında  Felestin prezidenti  Mahmud Abbas felestin devletiniñ mustaqilligini tanımaq ve sıñırlarını belgilemek ricasınen çıqışta bulunacaq.  

Bundan da ğayrı, Felestinniñ Ukrainada elçisi Al-Asaad 2011 senesiniñ oktâbr ayında Kiyevde olacaq Meclis reberleriniñ Ukrainada çalışqan çetelli elçiler ve halqara teşkilâtlar ile körüşüvden haberi olğanını aytıp, mezkür tedbirde şahsen iştirak etecegini bildirdi.

Subet vaqtında  körüşüv iştirakçileri Meclisniñ teşebbüsi ve teşkilâtçılığı ile  Qırımda qırımtatar halqınıñ öz Vatanında aq-uquqlarını ğayrıdan tiklev, onıñ Ukrainada telükesizligini teminlev  meselesi boyunca halqara forumnı azırlav ve keçirüvnen bağlı fikirlernen paylaştılar.