Meclis reisi Almaniyanıñ Ukrainadaki elçisine qırımtatar halqına yardımı içün samimiy teşekkürini bildirdi

04 Iyül 2012

Qırımtatar halqı Meclisiniñ reisi Almaniyanıñ Ukrainadaki elçisiniñ şerefine teşkil etilgen qabulda iştirak etti.

Qabul Yevro 2012 futbol çempionatı yekünlengeni ve Almaniyanıñ Ukrainadaki Tolu vekâletli ve Vefqulade Elçisi Gans Yorgen Gaymzyotnıñ elçilik vazifesiniñ müddeti soñuna kelgeni munasebetinen keçirildi.

Mustafa Cemilev Almaniyanıñ Ukrainadaki elçisi Gaymzyotqa Ukrainanıñ Avropa halqları ailesine kirsetilmesine qoltutqanı, sürgünlikten yurtuna qaytqan ve yerleşmekte olğan qırımtatar halqına aqlarını tiklev işinde yardımı içün samimiy teşekkürini bildirdi.

Meclis reisi Elçige hatire olaraq qırımtatar çölmekçi ustası Rustem Skibin yapqan çiniy tabaqnı ediye etti.