Meclis reisi 103 yaşlı Selime Memetovanı doğğan kününen hayırladı

25 Dekabr 2013

2013 senesi dekabr 25 künü Aqmescit rayonında yaşağan Selime Memetova 103 yaşını toldurdı.

Selime bita küçük oğlunıñ ailesinen beraber yaşağan Aqmescit rayonındaki Yuqarı Asma köyüne onı 103 yaşınen hayırlamaq içün Meclis reisi Refat Çubarov, Meclis Prezidiumınıñ azası Sadıh Tabah, Beşterek köy meclisiniñ reisi Nariman Abdurahmanov, soy-aqrabaları ve qomşuları keldiler.

Selime bita 1910 senesi Bağçasaray rayonınıñ Kermençik köyünde doğdı. Kence oğlu İsanıñ aytqanına köre Selime bita 9 balalı aileniñ eñ büyügi eken.

“Sürgünlikniñ birinci yıllarında anam bir çoq semetdeşler sırasında Uralda ağır şaraitlerde dağ kesken, – ikâye ete İsa bey. – O aptemnen ekimizni, torunları ve torunçelerini halqqa, Vatanğa, dinge sevgi ruhunda terbiyeledi. Onıñ yanında kimdir yalan aytsa, aldatsa ya da öşek tarqatsa pek açuvlana edi”.

Musafirlernen birlikte Selime bita da qave içip, çoq şaqalaştı ve eski qırımtatar yırlarını icra etip er kesni hoşnut etti.

Hayırlamağa kelgenlerge teşekkür bildirgen Selime bita musafirlerge Vatanda uzun yıllar bahtlı-çastlı yaşamaqnı tiledi.