Meclis qırımtatarlarnıñ menfaatlarını ne derecede qorçalağanı boyunca Razumkov Merkezi tedqiqatlarına tüzetüvler

04 March 2013

Kütleviy matbuat vastalarında Qırımtatar halqınıñ Meclisine işançnıñ seviyesi aqqında tolu olmağan malümatlar Razumkov Merkezine sıltap berilgeni esapqa alğanı devletke ait olmağan analitik Razumkov Merkezi tedqiqatlarnıñ Mecliske işanç hususında olğan mesele boyunca malümatlarını degil de “Meclis qırımtatarlarnıñ menfaatlarını ne derecede qorçalay?” degen meselege ait malümatlarnı seslendirgen şahıslarnıñ diqqatını celp etti.

Qırımtatar halqı Meclisiniñ reisi, Ukraina halq deputatı Mustafa Cemilev emin ki, Razumkov Merkezi malümatlarınıñ bozıp kösterilmesi – araştırmalarnıñ eki yönelişini añlı şekilde qarıştırmaq maqsadında yapıla. “Cümleden, Qırım Nazirler Şurasınıñ reisi Anatoliy Mogilöv işanç seviyesi boyunca meselenen Meclis tarafından qırımtatar halqı menfaatlarınıñ qorçalanması meselesini, bivasta sorav neticelerini bile turıp añlamağan kibi oldı. Böyleliknen doğru olmağan malümatlarnı ketirgen Mogilöv cemaatnı şaşmalata”, dep saya M. Cemilev.

Meclis reisi kene de şu Razumkov Merkeziniñ malümatlarına köre ealiniñ Qırım Yuqarı Şurası ve Nazirler Şurasına işanç seviyesi 8 fayızdan artmağanını da hatırlattı.

Öz nevbetinde Razumkov Merkezinde sotsiologik araştırmalarnıñ malümatlarını, bilhassa suallerni ve olarğa berilgen cevaplarnıñ bütün variantlarını tam köstermek kerekligini qayd ettiler.

Tedqiqat malümatlarını tam köstermek maqsadında aşağıda soravnıñ suallerini ketiremiz

Araştırmalar Razumkov Merkezi tarafından 2011 senesi fevral 21-den mart 14-ke qadar Qırımda ve Aqyarda keçirilip, 18 yaşından başlap 2020 insandan soraldı. Seçilgen cevaplarnıñ 2,3 fayızında husur olabilir.

Qoyulğan sualge Razumkov Merkeziniñ sualine köre Qırım ealisiniñ soravdan keçirilgen 100 fayızından 42,4 fayızıMeclis qırımtatar halqınıñ menfaatlarını tolusınen qorçalay, dep cevaplandı, 20,1 fayızı – belli bir derecede, 4,6 fayızı – deyerlik qorçalamay, 3,4 fayızı – Meclis aslı da qorçalamay dep saya. 29,6 fayızı ise sualge cevap bermege qıynaldılar.

Razumkov Merkezi qırımtatarlar arasında tıpqı böyle sorav neticeleriniñ ayrıca statistikasını öz saytında yerleştirdi.

Tedqiqatlarğa köre qırımtatarlarnıñ 25 fayızı Meclis qırımtatarlarnıñ menfaatlarını qorçalay, 39,7 fayızı – belli bir derecede, 11, 4 fayızı – deyerlik qorçalamay, 7,1 fayızı – aslı da qorçalamay, dep saya. Qırımtatarlarnıñ 16,8 fayızı sualge cevap berip olamadı.

Sotsiologik soravnıñ tolu neticelerinen “Milliy telükesizlik ve mudafaa” mecmuasınıñ 2011 senesi №4-5 sanlarında tanış olmaq mümkün.

Şunı da hatırlatmalı ki, 2013 senesi fevral ayında Qırım Nazirler Şurasınıñ reisi Anatoliy Mogilöv Meclis reisi, Ukraina halq deputatı Mustafa Cemilevniñ qırımtatarlarnıñ siyasiy sebeplerge köre işten boşatılğanı aqqında sözlerini izaatlarken Razumkov Merkeziniñ malümatlarına köre qırımtatarlarnıñ mecliske işanç derecesi 25 fayızdan yüksek degil, degen edi.