Menu 
Meclis: qırımtatarlar ve akimiyet arasında dialog yoq
20 Oktâbr 2011
Aqmescit – Qırımtatar halqı Meclisi liderleriniñ aytqanına köre, qırımtatarlar ve muhtariyet ükümeti arasında dialog toqtadı. Pavel Burlakov vaqtınca olaraq yolbaşçılıq yaptığı Qırım ükümeti Meclisnen iş tutqan “rahmetli Vasiliy Cartınıñ yolundan çekildi”. Bu aqta Azatlıq radiosına Meclis reisi Mustafa Cemilev ayttı. Ükümetniñ vazifedar hadimleri ise bunıñnen razı olmayıp, iş adetteki rejimde kete, dep izaat berdiler.
Avgust ayında Qırım baş naziri Vasiliy Cartı vefat etken soñ onıñ vazifesini vaqtınca eda etken Pavel Burlakovnen Meclis lideri Mustafa Cemilev faqat bir kere körüşti.
Mustafa Cemilevniñ bildirgenine köre, akimlernen dialog deyerlik kesildi, bundan da ğayrı vazifeder şahıslar qırımtatarlarnı aqsımlağan bir qararlarnı qabul etip başladılar.
“Vasiliy Cartınıñ cenazesinde Burlakov onıñ yolunı devam etecegine yemin etken edi, amma endi bir qaç küç keçer-keçmez tam ters bir qarar aldı. Eger yazda Cartı Kefe yanında haç tiklenmesine bunıñ dinnen alıp berecegi olmağan provokatsiya, dep qıymet kesken olsa, Burlakov reberligindeki ükümet bu haçnı qoymaq qararını imzaladı. Buña konstruktiv yanaşuv, dep olamamız”, – dep qayd ete Mustafa Cemilev.
Bunıñ kibi de o, qırımtatarlarnı muhtariyat icra komitetlerinden işten boşatqanları, qırımtatar medeniy variyetinden yekâne saqlanıp qalğan Hansaraynıñ reberi de Meclis ile añlaşılmadan deñiştirildi, topraq meselesiniñ çezimi de yarı yolda qalğanını köstergen misallerni ketirdi.
Qırım baş naziri tayinlengen soñ dialog devam etermi?
Baş nazir muaviri Yekaterina Yürçenko bunıñnen razı degil, onıñ fikirince Meclis ve akimler arasında dialog, sürgünlikten qaytqanlarnı topraqnen teminlev de devam ete. “Men bu dialognı körem, bu dialogda iştirak etem. Bir çoq meseleler çezile ve çezilecek. Evel başlanğan bu ağır iş endi bir tertipke keldi”, – dedi Yekaterina Yürçenko.
Misal olaraq o, qırımtatarlarnı qaytaruv ve yerleştirüv programmasını finansirlevni başlamaq içün birlikte areket etkenlerini ayttı. Belli ki, programmanıñ finansirlenüvi bu seneniñ başında toqtatılğan edi. Baş nazir muavini şunı da bildirdi ki, para endi noyabr ayında kelecek. Bundan da ğayrı, Qırım ükümeti Ukraina devlet bücetine qırımtatarlarnıñ qaytuvı ve yerleştirilüvi programmasına sermiya kirsetilmesini talap ete, dep bildirdi YE. Yürçenko. Muhtariyat Ükümeti reisiniñ yardımcısı Aleksandr Formançuk ise qırımtatarlarnıñ liderleri ve cumhuriyet akimleri munasebetlerinde problemler olğanını tanıy.
“Cartı bergen siltem bugünde-bugün eksildi ve sönmekte. Bu, birinci nevbette Burlakovnıñ onı reis olaraq tayinleyceklerine şübelengeninen bağlıdır. Şunıñ içün de Prezident Memuriyetine kerginlik aqqında laflar yetip barmasından saqınalar. Baş nazirn tayinlenmesiniñ bu qadar sozulması dialognıñ devam etmesine mania ola”, dep saya siyasetşınas.
Bunıñnen beraber Aleksandr Formançuk Qırımda ükümetke reis, kim olğanından qatiy nazar, tayinlengeninen qırımtatarlar ile dialog tiklenecegini tahmin ete.
Vladimir Pritula
