Meclis prezidiumı 2014 senesi yanvar 16-da qabul etilgen qanunlarnı acele lâğv etmek ve meydanğa kelgen vaziyetniñ barışıqlı çezilmesine doğrultılğan qararlarnı almaq maqsadınen Ukraina Yuqarı Şurasınıñ nevbetten tış sessiyasınıñ çağırılmasını talap

21 Yanvar 2014

Qırımtatar halqı Meclisiniñ

Beyanatı

Ürmetli vatandaşlar!

Ukraina ve onıñ sakinleri mustaqillik ilân etilgen soñ eñ telükeli ve facialı künlerni yaşamaqta. Ukraina Prezidenti ve Ükümeti devletniñ tışqı siyasiy yönelişini kesen-kes deñiştirgenleri neticesinde yüz bergen siyasiy inqıraz cemiyet ve akimiyet arasında açıq ve küç ile qapa-qarşılıq basqıçına keçti.

Kiyevde tınç toplantı iştirakçileri ve İçki işler nazirliginiñ mahsus qoşunları arasında çatışma neticesinde qan töküldi, yüzlernen insan qurşunnen yaralandı, zarar kördi.

Memlekette zorbalıqnıñ quvetleşmesi diktatura ve basqı rejiminiñ tesis etilmesine ketirebilir, bu ise Ukraina ve milleti ve dininden qatiy nazar vatandaşları içün felâket olur.

Bugünki vaziyette er bir saat ve memleketniñ er bir sakininiñ aktivligi qıymetlidir. Qırımtatar halqınıñ Meclisi qırımtatar milliy areketiniñ esası olğan qansız-davasız küreş printsiplerine köre Ukrainanıñ bütün vatandaşlarını, Qırım sakinlerini insan aqları ve serbestligini qorçalamaq içün çıqmağa çağıra.

Meclis prezidiumı 2014 senesi yanvar 16-da qabul etilgen qanunlarnı acele lâğv etmek ve meydanğa kelgen vaziyetniñ barışıqlı çezilmesine doğrultılğan qararlarnı almaq maqsadınen Ukraina Yuqarı Şurasınıñ nevbetten tış sessiyasınıñ çağırılmasını talap ete
 

Refat Çubarov
Qırımtatar halqı Meclisiniñ reisi