Meclis idaresiniñ başı Emine Avamileva Bulğanaq köy meclisniñ aktivi ile körüşti

26 Dekabr 2013

Dekabr 25 künü Aqmescit rayonınıñ Bulğanaq köyünde Meclisniñ Qırımtatar tilinde tasil meseleleri ve qırımtatar tilini Qırımnıñ devlet ve cemaat saalarına tadbiq etüv idaresiniñ başı Emine Avamileva yerli meclisniñ aktivi ile körüşti.

Körüşüvde idare azaları – qırımtatar tilinde ilmiy, oquv qullanmaları ve bediiy edebiyatnı neşirge azırlav ve neşir etüv bölüginiñ başı İbraim Çegertma, qırımtatar tilinde tasil meseleleri boyunca bölük başı, pedagogika ilimleri namzeti Enise Abibullayeva, Bulğanaq yerli meclis reisi Aziz Sadıkov ve azaları Ridvan Saliyev ve Remzi Âyayev iştirak ettiler. Yerli meclis reisi Aziz Sadıkovnıñ aytqanına köre Bulğanaq köy şurasında 6 biñ adam yaşap, olardan 2145 kişi yani ealiniñ 33 fayızını qırımtatarlar teşkil ete. “Yerli şuranıñ 34 deputatından 10 neferi bizim semetdeşlerimiz.

Bulğanaqta qırımtatar tilinde oqutılğan mektep bar, Qamber köyünde tek başlanğıç mektep bar. Can cürek köyündeki başlanğıç mektep ise bu yıl qapatıldı, – dey Aziz Sadıqov. Onıñ bildirgenine köre 2011 senesi Qırımtatar halqınıñ matem künü arfesinde yerli meclis, deputatlar ve köy sakinleriniñ areketleri sayesinde köyge kirişte onıñ eski adı yazılğan direk qoyuldı.

İş körüşüviniñ devamında taraflar ana tilinde tasil uquqını kerçekleştirüv saasında Meclis idaresi ve yerli meclis arasındaki işbirlik meseleleri, qırımtatar tiliniñ epsi saalarda qullanılmasına dair ve diger teşkiliy meselelerni muzakere ettiler.

Bulğanaq köyüne ziyaret çerçivesinde iş körüşüviniñ iştirakçileri Bulğanaqtak mektepniñ yolbaşçıları ve ocalarınen körüştiler. Mektepte 257 talebe oquy, başlanğıç mektepniñ 4 sınıfı mevcut. Körüşüv iştirakçileri qırımtatar tilinde oqutuv usulları ve birlikteki leyhalarnı amelge keçirüv imkânlarını da baqıp çıqtılar.