Meclis delegatsiyasınıñ Almaniya “Birlik 90/ Yeşiller” partiyasınıñ ekinci reisi Cem Özdemir ile körüşüvi

30 Mart 2011

2011 senesi iyün 28=de Almaniyağa iş ziyareti çerçivesinde Milliy Meclis reisi, Ukraina halq deputatı Mustafa Cemilev reberligindeki Qırımtatar halqı Meclisiniñ delegatsiyası Bündestagda Almaniya “Birlik 90/ Yeşiller” partiyasınıñ ekinci reisi Cem Özdemir ve şu partiyadan Bündestag deputatı, alman-ukrain parlament gruppasınıñ azası Viola fon Kramon ile körüşti.

Bündestag binasında yerleşken Yakob-Kayzer-Haus bürosında keçken bu körüşüvde Bütündünya qırımtatar kongressiniñ prezidenti Refat Çubarov, Milliy Meclis tışqı alâqalar bölüginiñ başı Ali Hamzin, professor Svetlana Çervonnaya ve Milliy Meclis reisiniñ yardımcısı Lilâ Müslimova ve bunıñ kibi de Şarqiy Avropağa qoltutuv cemiyetiniñ vekilleri, Bütündünya qırımtatar kongressiniñ azası, Milliy Meclisniñ Almaniyadaki azası Ahmet Ozay, Ğarbiy

Avropa qırımtatar medeniyet ve yardımlaşuv cemiyetiniñ reisi Rafet Qaranlıq ve Köln şeer şurasınıñ deputatı Erhan Qara iştirak ettiler.

Körüşüv devamında M. Cemilev qırımtatar halqınıñ şimdiki sotsial-iqtisadiy ve siyasiy-uquqiy problemleri aqqında çıqış yaptı ve, cümleden: “20 yıl evelsi mustaqillikke irişken Ukrainada qırımtatar halqınıñ siyasiy, iqtisadiy, sotsial ve medeniy uquqları bu küngece tiklenmedi ve buña dair iç bir qanun qabul etilmedi. Qırımtatar halqınıñ ana-Vatanğa avdeti daa bitmedi, çünki on biñlernen qırımtatarlar sürgünlik yerlerinde yaşap, ana-Vatanğa qaytıp kelmek imkânına malik degiller”, dep qayd etti M. Cemilev.

Refat Çubarov ise öz çıqışında Halqara forumğa azırlıq ketişatı aqqında tafsilâtlı malümat berdi ve Almaniyanıñ Yeşiller firqası böyle forumnı ömürge keçirmege öz issesini qoşacağına işanç bildirdi.

“Birlik 90/ Yeşiller” partiyasınıñ ekinci reisi Cem Özdemir ve şu partiyadan Bündestag deputatı, alman-ukrain parlament gruppasınıñ azası Viola fon Kramon qırımtatar meselesini em Almaniyadaki, em de Avropa parlamentindeki siyasiy ortaqlar ile beraber muzakere etmege azır olıp, bu yıl oktâbr ayında Ukrainanı ziyaret eteceklerini ve mında da şu meseleni Ukraina parlament azalarınen beraber baqacaqlarını bildirdiler.

Körüşüvniñ soñunda taraflar Qırımtatar halqı Meclisi ve Almaniya Yeşiller partiyası arasında daimiy informatsion bağlarnı pekitüv aqqında añlaştılar.

Malümat içün:

“Birlik 90/ Yeşiller” – Almaniyanıñ “yeşil” firqasıdır. “Yeşiller” Avropa ekologiya partiyalarına mensüp olup, öz programmalarında bazar iqtisadiyatını tabiatnı qorçalav ve saqlav işinen beraber alıp barmaq, etraf müit devletniñ nezaretinde bulunmasını közetmekni baş maqsad olaraq qoyalar.

Birlik 90/ Yeşiller” partiyası Genrih Böllniñ ükümetten tış fondı birlikte iş alıp bara.
2010 senesi noyabr 25 –ke kelip partiyanıñ saflarında 51 822 aza bulunıp, olarnıñ orta yaşı 38 yaştır. Partiya idaresiniñ reisleri — Klaudia Rot (Klaudia Roth) ve Cem Özdemir (Cem Özdemir).

Cem Özdemir – türk asıllı alman siyasetçisidir. Ekinci reis olaraq 2008 senesi noyabr 15-te partiyanıñ Erfurt şeerinde olğan toplaşuvında saylandı. Onıñ namzeti içün deputatlarnıñ 80 fayızı rey berdi. Böyleliknen o, Almaniya umumilliy siyasiy partiyanıñ milliy mensüpligi boyunca alman olmağan birinci yetekçisidir.

2009 senesi olğan soñki federal saylavlarda “Yeşiller” 10,7 % rey ve 68 deputatlıq mandatlarını qazandılar. Bir mandatlı okrugdan 622-den – 1, ve partiya cedveli boyunca 67 mandatnı elde ettiler.

Avropa parlamentinde Yeşiller partiyasını 14 deputat temsil eteler.