Meclis delegatsiyası Ukrainanıñ Litvaniyadaki Elçihanesini ziyaret etti

24 Oktâbr 2013

Oktâbr 21 kününiñ ekinci yarısında Meclis delegatsiyası Litvaniya Cumhuriyetine iş ziyareti programması çerçivesinde Ukrainanıñ Litvaniyadaki Elçisi Valeriy Jovtenko ile körüşti.

Körüşüv devamında Meclis reisi, Ukraina halq deputatı Mustafa Cemilev Ukraina Elçisine Litvaniya tarafı daveti ilke kelgen delegatsiyanıñ ziyaret maqsadını añlattı.

Körüşüvde Meclis tışqı alâqalar bölüginiñ başı Ali Hamzin, Litvaniya tatarları cemiyetiniñ başı, Meclisniñ Litvaniyadaki temsilcisi Adas Yakubauskas ve Ukraina halq deputatı Mustafa Cemilevniñ iqtisadiy meseleler boyunca yardımcısı Rustem Ümerov iştirak ettiler.

Mustafa Cemilev şunı ayrıca qayd etti ki, qırımtatar halqınıñ idare institutları Qurultay-Meclis mustaqillik devri devamında Ukrainanıñ demokratik küçlerine ve Ukrainanıñ Avropa Birligine kirmek istegine qoltuta.

Bu sırada Mustafa Cemilev Qırımda qırımtatar halqınıñ mürekkep vaziyeti ve mustaqillik deviri zarfında qırımtatar halqınıñ siyasiy, sotsial, iqtisadiy ve medeniy aqlarınıñ ğayrıdan tiklenmesi boyunca iç bir qanun qabul etilmegenine de diqqatnı celp etti.

Meclis reisi 2013 senesi sentâbr 19 künü Qırım Nazirler Şurasında Avropa Birliginiñ Komissarı Ştefan Füle ile körüşüv aqqında aytıp, Komissar Meclisniñ qırımtatar halqı aqlarını tiklev boyunca halqara forum keçirmek teşebbüsine qoltutqanını ayrıca seslendirdi.

“Ştefan Füle ukrain akimlerini Qırımtatar halqınıñ Meclisini tanımaq imkânlarını tapmağa çağırdı, – dedi Mustafa Cemilev. – Avropa Birligi Komissarınıñ bu teklifi, bunıñ kibi de qırımtatarlarnıñ aqları aqqında meseleniñ sentâbr 26-da Brüsselde Avropa parlamentinde acele diñlenilmesi Qırımda milletlerara ve dinlerara munasebetlerde kerginlikten delâlet bere. Musulmanlarnıñ büyük bayramı künlerinde camiler yaqılğanı qırımtatarlarnıñ Ukrainada aqsımlanğanını köstere”.

Mustafa Cemilev emin ki, qasım ayında Vilnüste Ukrainanıñ Avropa Birliginen birleşme boyunca añlaşma imzalaması Ukrainada insan, milliy azlıqlar ve tamır halqlarnıñ aqlarını saqlav saasında avropa standartlarınıñ tadbiq etilmesine müsbet tesir keçirir.

“Ukrainanen añlaşma imzalanğan soñ Avropa Birligi devletlerini Ukrainağa bir sıra şartlarnı yerine ketirmese de Avropanıñ ayırılmaz bir qısmı olmasına siyasiy avans bermege çağıramız ki, ileride bu şartlarnı mıtlaqa becerir”, – dedi sözüniñ soñunda Meclis başqanı.

Ukrainanıñ Litvaniyadaki Elçisi Valeriy Jovtenko şahsen Mustafa Cemilev ve Qırımtatar halqınıñ Meclisine Ukraina tarihında pek müim yer tutqan vesiqa imzalanması ögünden Ukrainadaki ağımdaki vaziyetni bu qadar teren ve yahşı añlağanı içün samimiy teşekkürlerini bildirdi.

Valeriy Jovtenkonıñ aytqanına köre Ukraina – bu Avropa devleti ve Avropa alanında bulunırken Avropa standartlarına ve yaşayış normalarına taba ıntılacaq. Bu ise bugünki Ukrainanıñ, ukrain, şu cümleden qırımtatar, milletiniñ inkişafı içün ğayet müimdir.

Mustafa Cemilev Meclis adından Ukraina Elçihanesine Valeriy Vozgrinniñ “Qırımtatarlar tarihı” 4 cıltlıq kitabını bağışladı. Ukrainanıñ Litvaniyadaki Elçisine bunıñ kibi de OSCE Aliy komissarı tarafından azırlanılğan “Evel sürgün olunğan şahıslarnıñ Qırımda, Ukrainada qatıluvı” maruzası da berilecek.