Meclis Çehiya Cumhuriyetiniñ diplomatlarını qabul etti

02 April 2013

Qırımda iş ziyaretinen bulunğan Çehiya Cumhuriyetiniñ Ukrainada Vefqulade ve Tolu Vekâletli elçisi İvan Poçuh aprel 2 künü Qırımtatar halqı Meclisine teşrif buyurdı.

Ürmetli musafirni ve oña refaqatlıq yapqan Çehiyanıñ Ukrainadaki elçiliginiñ üçünci kâtibi Lüboşşç Veselini Meclis reisiniñ birinci muavini Refat Çubarov, reisi muavini Remzi İlyasov ve tışqı alâqalar bölüginiñ başı Ali Hamzin qarşıladılar. Körüşüv iştirakçileri Qırımda siyasiy-içtimaiy vaziyet ve qırımtatarlarnıñ bugünki alı aqqında fikirlerinen paylaştılar

Qırımtatar halqı milliy idare organları olğan Meclis ve yerli mecliler ve Qırım akimiyeti arasındaki munasebetlerde ayrıca toqtalğan Refat Çubarov olarğa “qarardan ziyade kergin” diye qıymet kesti.

Akimiyet tarafından munasebetniñ böyle keskinleşmesiniñ sebebini Refat Çubarov Ukraina merkeziy akimiyetiniñ qırımtatar halqınıñ aqlarını tiklevnen bağlı problemlerini çezmege istemegeninde köre.

“Qırımnıñ tamır halqınen açıq ve namuslı dialog, şu problemlerni tezce çezmek içün halqara teşkilâtlarnen işbirlikte menfaatdar olmaq yerine akimiyet qırımtatar cemiyeti ortasına şına qaqmaqnı üstün kördi. Böyle fikir doğa ki, sanki tek qırımtatar halqını degil de, bütün ukrain cemiyetini de sovet rejimi şaraitlerine yani siyasette “parçalap, ükümranlıq et” printsipi esas printsip olğan vaqıtqa qaytarmağı tırışalar”, – dep qayd etti Çubarov.

Remzi İlyasov ve Ali Hamzin subet devamında musafirlerniñ diqqatını Qırımnıñ icra ve vekâletli organlarında siyasiy sebeplerge köre kadrlar temizligi keçirilgenine czelp ettiler. Bu munasebetnen cenap elçi Qırım Yuqarı Şurası Prezidiumınıñ erkânında olğan deñişmelernen meraqlandı.

Körüşüv iştirakçileri Qırımtatar halqınıñ Qırımda aqlarını tiklev, onıñ Ukrainada telükesizligi ve inkişafı kefilligini teminlev meselesi boyunca Halqara forum keçirilmesi etrafında meydanğa kelgen vaziyetni de talil ettiler.

Şu da qayd olundı ki, Meclisniñ mezkür Forumnı keçirmek teşebbüsine Avropa Birliginiñ azası olğan devletler, Kanada, AQŞ, Türkiyeniñ vekilleri, BMT, OSCE, Avropa Birligi kibi halqara teşkilâtları qoltuttılar. Endi Ukraina tarafından bir yıldan berli beklenilgen resmiy cevapnı almaq qaldı.
Körüşüv iştirakçileri Halqara forumnı keçirüv boyunca bir sıra tekliflerni seslendirdiler.