Meclis azası Emine Avamileva qırımlı blogerlernen körüşti

12 Noyabr 2013

Keçken afta Aqmescitte Qırımtatar halqı Meclisiniñ azası, qırımtatar tilinde tasil ve qırımtatar tilini Qırımnıñ devlet ve cemaat ömüriniñ bütün saalarına tadbiq etüv meseleleri boyunca idareniñ başı Emine Avamileva qırımlı blogerlernen körüşti.

Körüşüvni AQŞnıñ Ukrainadaki elçiligi qoltutuvında kerçekleşken leyha çerçivesinde Qırım mustaqil siyasiy tedqiqatçılar ve jurnalistlerniñ merkezi tarafından teşkilâtlandırılğan “Yerli problemler aqqında nasıl etip meraqlı yazmaq kerek?” mevzusındaki trening çerçivesinde keçirildi, dep haber ete “Krimskotatarske pitannâ online”

Körüşüv devamında Emine Avamileva, cümleden qırımtatarlarnıñ milliy idare qurumınıñ meydanğa ketirilmesi ve inkişafı , qırımtatar cemiyeti, qırımtatar tilini saqlap qalmaq içün üç tilli tasil istiqballeri aqqında ikâye etti. Trening iştirakçileri olarnı meraqlandırğan suallerni bermek ve Meclisniñ milliy tasil meselelerini idare etken azasınen şahsen qonuşmaq imkânına malik oldılar. Trening neticelerine köre onıñ iştirakçileri Emine Avamileva ile körüşüvni öz bloglarında yayınladılar.

Tedbirniñ treneri Qırımda nam qazanğan jurnalist, dotsent, içtimaiy kommunikatsiyalar boyunca ilim namzeti, Tavriya Milliy universiteti Slavân filologiyası ve jurnalistika fakulteti tillerara bağlar ve jurnalistika kafedrasınıñ ocası Ölga Volodçenko olıp, oña Qırımda matbuat serbestligi monitoringi boyunca komitet reisi, “Krimskotatarske pitannâ” internet neşiriniñ muarriri, “Azatlıq radiosınıñ” jurnalisti Vladimir Pritula, “Krimskotatarske pitannâ online” portalınıñ muarriri Svetlana Yereşçenko yardım ettiler.

Trening devamında Qırımnıñ Canköy, Qarasuvbazar, Yalta, Aluşta, Kezlev, Aqmescit regionlarında kelgen iştirakçiler bloglarda haberlerni yayınlamaq usulları, haber menbalarınen çalışuv ve haber yazmaq tehnologiyası ile tanış oldılar. Bundan da ğayrı trening iştirakçileri İnternet ağlarında qonuşuv ve bloglarnı alıp baruv printsipleriniñ manifestini imzaladılar.

Foto: “Krimskotatarske pitannâ online”