Meclis azaları Birleşken muhalifet «Batkivşçina» Bütünukrain cemiyeti ve Qırımtatar halqı Meclisiniñ müşterek beyanatına qoltuttılar

29 Iyül 2012

2012 senesi iyül 28 künü olıp keçken Meclisniñ kenişletilgen toplaşuvında regional meclislerniñ reisleri de iştirak ettiler. Toplaşuvda Meclis reisi Mustafa Cemilev Meclis azalarını iyül 27 künü Kiyevde imzalanğan Birleşken muhalifet “Batkivşçina” Bütünukrain cemiyeti ve Qırımtatar halqı Meclisiniñ müşterek beyanatınını oqudı.

“2012 senesi parlament saylavlarında birlikte iş alıp barmaq aqqındaki mezkür beyanatnı ukrain ve rus tillerinde beraber keçirilgen matbuat konferentsiyasında Qırımtatar halqı Meclisiniñ reisi Mustafa Cemilev, Birleşken muhalifet “Batkivşçina” Bütünukrain cemiyeti keñeşiniñ reisi Arseniy Yatsenük ve Birleşken muhalifet “Batkivşçina” Bütünukrain cemiyeti merkeziy saylav ştabınıñ yolbaşçısı Aleksandr Turçinov imzaladılar”, – dedi Meclis reisi.

Belli ki elde etilgen añlaşmağa köre Meclis 2012 senesi parlament saylavlarında Birleşken muhalifet “Batkivşçina” Bütünukrain cemiyetiniñ siyasiy pozitsiyası ve programmasına qoltutmaq ve saylav ceryanı iştirakçilerini er angi seviyelerde musaviy imkânlarnen teminlemek meselelerinde beraber iş alıp barmaq qararını aldı.

Meclis reisi bunıñ kibi de toplaşuv iştirakçilerine iyül 30 künü Birleşken muhalifet “Batkivşçina” Bütünukrain cemiyetiniñ saylavaldı qurultayına davet etilgenini bildirip, onda şu siyasiy küç tarafından bir mandatlı saylav dairelerde deputatlıqqa kösterilgen namzetler cedveli taqdim etilecegini söyledi.

Malüm ki, 2012 senesi iyül 21-de Qurultay delegatları tarafından qabul etilgen “Ukraina halq deputatlarını saylav ve qırımtatar halqı öz-özüni idare etüv milliy organlarınıñ vazifeleri aqqında Qurultay qararı”nıñ çerçivesinde Mecliske 2012 senesi oktâbr 28-de olacaq saylavlarda qırımtatarlarnıñ pozitsiyasını belgilemek ve milliy idare organları tarafından onıñ eda etilmesini teminlemek avale olunğan edi.

Meclis azaları Birleşken muhalifet “Batkivşçina” Bütünukrain cemiyeti ve Qırımtatar halqı Meclisiniñ müşterek beyanatına bir ağızdan qoltutıp, Birleşken muhalifet “Batkivşçina” Bütünukrain cemiyetiniñ qurultayı içün Qırımdaki majoritar saylav daireleri boyunca bir sıra tekliflerni azırlamaq qararını aldılar.

Meclis azaları bunıñ kibi de Birleşken muhalifet “Batkivşçina” Bütünukrain cemiyeti ve Qırımtatar halqı Meclisinden Qırımda bir mandatlı dairelerge deputatlıqqa kösterilgen namzetlerge de qoltutmağa azırlıqlıqlarını bildirdiler.