Meclis azaları Avropa Birliginiñ Ukrainadaki Temsilciliginiñ başı Yan Tombinski ile körüşti

30 April 2013

2013 senesi aprel 30 künü Aqmescitte Qırımtatar halqı Meclisi reisiniñ birinci muavini Refat Çubarov Qırımda iş ziyaretinen bulunğan Avropa Birliginiñ Ukrainadaki Temsilciliginiñ başı, elçi Yan Tombinski ile körüşti. Körüşüvde Meclisniñ tışqı alâqalar bölüginiñ başı Ali Hamzin ve Avropa Birliginiñ Qırım ve Aqyar boyunca birleşken teşebbüsiniñ koordinatorı Entso Damiani iştirak ettiler.

Körüşüv iştirakçileri Qırımdaki siyasiy-içtimaiy vaziyet ve qırımtatar halqınıñ alınen bağlı bir sıra meselelerni muzakere ettiler. Yan Tombinskiniñ ricası boyunca Refat Çubarov Qırım icra akimiyeti ve qırımtatarlarnıñ aliy vekâletli organı olğan Meclis arasında munasebetlerniñ ep kerginleşkenini qayd etti.

“Qırım akimiyeti qırımtatarlarnen dialog qurmaq istemegenleri aqılğa yatmağan qararlarğa alıp kele, – dedi Refat Çubarov. – İşte, Qırım Nazirler şurasınıñ fermanınen qırımtatar milliy bayramı Hıdırlezni halq asırlar devamında qayd etken künü degil de başqa künlerde qayd etmek tevsiye oluna.

Em de akimiyet “bayram” künleri olaraq mayıs 10,11 ve 12 künlerni yani qırımtatarlarğa 1944 senesiniñ facialı vaqialarnı hatırlatqan künler belgilenip, böyleliknen bütün bir halqnıñ milliy hatıra ve degerligi aqaret etile”

Körüşüvniñ esas qısmını onıñ iştirakçileri Qırımtatar halqınıñ öz Vatanında aqlarını tiklev ve onıñ Ukrainada telükesizligi ve inkişafını teminlev boyunca halqara forumğa azırlıq işlerine dair meselelerniñ muzakeresine bağışladılar.

Qırımtatar halqı Meclisiniñ vekilleri 2013 senesi noyabrde Vilnüste olacaq Ukraina ve Avropa Birligi sammiti qırımtatar meselesiniñ adaletli çezilmesine yañı imkânlar yaratacağına ümüt bildirdiler.