Meclis 5-nci çağırılış Qırımtatar halqı qurultayı dörtünci sessiyasını keçirüv müddetini belgiledi

14 Iyün 2012

2012 senesi iyün 13 künü olıp keçken Qırımtatar halqı Meclisiniñ toplaşuvında 5-nci çağırılış Qırımtatar halqı qurultayı dörtünci sessiyasını keçirüv müddetini ve yerini belgiledi.

Qurultaynıñ 4-nci sessiyasını ötkerüv müddeti boyunca muzakereden soñ Meclis azaları Qurultay reglamentine köre sessiyanı 2012 senesi iyül 21-22 künleri keçirmek qararını alıp, Qurultayğa azırlıq boyunca Teşkiliy hızmet erkânını da tasdiqladılar.

Bunıñ kibi de Meclis azaları Qurultay reglamentinen belgilengen müddette delegatlarğa kün tertibine kirsetmek teklif etilgen bir sıra meseleler boyunca da fikir paylaştılar. Qurultayda baqılması içün aşağıdaki esas meseleler teklif etile:

– Qırımtatar halqı qurultayı 5-ncı çağırılış delegatlarını saylav aqqında nizamnı tasdiqlav;

– 2012 senesi oktâbr ayında Ukraina halq deputatlarını saylav aqqında

– qırımtatar halqınıñ milliy gimni aqqında

Qırımtatar halqı Meclisiniñ azaları Qurultayğa azırlıq boyunca Teşkiliy hızmetke yaqın on kün içinde Meclisniñ muzakeresine Qırımtatar halqı qurultayı U1-ncı çağırılış delegatlarını majoritar-proportsional sistema esasında gizli rey berüv yolunen doğrudan-doğru umumiy, musaviy saylavnı közde tutqan saylav aqqında nizamnı tasdiqlavğa bermesi avale etildi.

Qarışıq majoritar ve proportsional saylav sisteması boyunca seçilgen delegatlarnıñ sayısı aqqında çeşit türlü fikirler yañğıradı. Qurultay delegatlarını saylav Nizam leyhasında bir qaç variant teklif olunıp, olardan tek biri Qurultay delegatları tarafından tasdiqlanacaq.

Qurultay reglamentine köre Qırımtatar halqı qurultayı 4-nci sessiyasınıñ kün tertibi kesinliknen delegatlar tarafından toplantınıñ başında tasdiqlana