Mayıs 18 künü Taşkentte sürgünlik qurbanlarınıñ hatırasını añdılar

20 May 2013

Taşkentte 2013 senesi mayıs 18 künü saba saat 10-dan saat 13-ke qadar Repressiya qurbanları hatırası müzeyinde qırımtatar halqı sürgünliginiñ 69 yıllığı munasebetinen matem tedbiri keçirildi. Bu aqta “Avdet” Qırımtatar milliy medeniy merkezi reisiniñ muavini Aliye İmadinova haber etti.

“Taşkentteki “Avdet” qırımtatar milliy medeniy merkeziniñ davetine seslengen semetdeşlerimiz sürgün etilgen insanlarnıñ hatırasını añmaq içün keldi, – dey A. İmadinova. – Accılarımıznı biznen beraber paylaşmaq içün Ukrainanıñ Özbekistandaki Vefqulade ve Toluvekâletli Elçisi Yuriy Savçenko, bunıñ kibi Ukrainanıñ Özbekistandaki Konsulı Sergey Kononenko, bunıñ kibi Avstraliya, Frantsiya, Çehiya ve AQŞdan arqadaşlarımız keldi”.

Repressiya qurbanlarına qoyulğan abide yanında Repressiya qurbanları hatırası müzeyiniñ direktorı Bahtiyor Hasanov ve Qırımtatar milliy medeniy merkeziniñ reisi Nusret Cemilev çıqışta bulundılar.

Yuriy Savçenko öz çıqışında 1944 senesi mayıs 18 faciası qırımtatar halqı tarihında qara saife olıp, böyle cinayet unutılmamalı ve ileride tekrarlanmasına yol qoymamalı, dep qayd etti.

Miting iştirakçileri qırımtatar halqı soyqırımı qurbanlarınıñ hatırasını bir daqqalıq sukünet ile añıp, hatıra taşına çeçekler qoydılar.

Matem merasimleri Repressiya qurbanları hatırası müzeyinde devam etip, onda müzeyniñ ilmiy hadimi Ravşan Nazarov, Tarih institutınıñ yetekçi ilmiy hadimi Rinat Şagobeddinov, Avstraliyalı tarihçı tedqiqatçı Riçard Ansel çıqışta bulundılar. Soñra Vatan aqqında şiirler yañğıradı.

“Ta ki hayatta ekenmiz, biz o qara künlerni unutmamaq, nesilden-nesilge halqımıznıñ accısını bildirmek borclumız, – dediler matem merasiminiñ iştirakçileri