Mayıs 18 künü Avropa Birligi devletlerinde qırımtatar halqı soyqırımı qurbanlarınıñ hatırasına bağışlanğan aktsiyalar ötkerilecek

14 May 2013

Mayıs 18 künü yerli vaqıtnen saat 12-de Qırımtatarlarnıñ matem kününde Avropa Birligi devletlerinde qırımtatar halqı soyqırımı qurbanlarınıñ hatırasına bağışlanğan aktsiyalar ötkerilip, Ukrainada qırımtatarlarnıñ aqlarını ğayrıdan tiklemek tatap etilecek.

Aktsiya iştirakçileri Qırım resmiy akimleriniñ qırımtatar halqına nisbeten aqsımlav areketlerini, qırımtatar halqınıñ saylanma organı olğan Meclis ve Qurultay qurumlarını körmemezlikke alğanlarını tenqid etecekler.

Aynı zamanda aktsiyada iştirak etken qırımtatar diasporası tez vaqıtta Qırımtatar halqınıñ aqlarını tiklev, Ukrainada onıñ telükesizligi ve inkişafını teminlev boyunca halqara forum keçirilmesine yardım etmelerini rica etip halqara teşkilâtlarğa muracaat etecekler.

Qırımtatar diasporasınıñ aktsiyaları Ukrainanıñ Brüsselde, Gaagada, Berlinde, Venada, Parijde, Londonda, Buharestte, Varşavada, Berndeki elçilikleri qarşısında ve Avropa Birliginiñ diger devletlerinde, bunıñ kibi de Türkineniñ Anqara ve İstanbul şeerlerinde keçirilecek.

Aktsiyada iştirak etmege uquqqoruv teşkilâtlarınıñ vekilleri, siyasetçiler, parlament deputatları davet olundılar.

Malümat: 1944 senesi mayıs 18 künü qırımtatarlar misilsiz sürgünlikke oğratıldılar. Bu cinayet maqsadlı soyqırım oldı, sürgünlikniñ birinci bir buçuq yılında açlıq, hastalıq, ağır şaraitlerden 1956 senesine qadar halqnıñ 46,2 fayızı, esasen qartlar, qadınlar ve balalar elâk oldı.