Mayıs 17-18 künleri Aqmescitniñ merkeziy meydanında resmiy matem tedbirler keçirilmesi kelişildi

14 Mayıs 2012

Mayıs 14 künü Qırım Nazirler Şurasınıñ meclisler zalında Qırım Nazirler Şurası reisiniñ muavini Aziz Abdullayev Qırımdan sürgün etilüv qurbanlarıñ hatırasına bağışlanğan matem tedbirlerini azırlav ve ötkerüv boyunca komissiyanıñ nevbetteki toplaşuvını keçirdi.

Toplaşuvda Qırımtatar halqı Meclisiniñ reisi, Ukraina halq deputatı Mustafa Cemilev iştirak etti.

Toplaşuv iştirakçileri Qırımtatar halqı sürgünliginiñ qurbanlarına bağışlanğan Bütünqırım matem mitingini ATR kanalında canlı şekilde köstermek içün donatmalarnı azırlav aqqında “Krım” devlet teleradiokompaniyası ve ATR qırımtatar kanalı vekilleriniñ esabatı diñlenildi.

“ATR” telekanalınıñ direktorı Elzara İslâmova toplaşuv reisi A.Abdullayevge ait hızmetler matem mitingi keçirilgen künlerde energetikanen teminlemelerini avale etmesini rica etti.

Toplaşuv devamında Qırım Nazirler Şurası reisiniñ muavini, Teşkiliy komitet reisiniñ muavini Aziz Abdullayev Qırım matbuat hadimlerine demiröl transportınıñ Qırımnıñ çeşit yerlerinden Aqmescitke kelmek ve qaytmaq areketiniñ mayıs 18 künü cedvelindeki deñişmeler aqqında cemaatçılıqqa bildirmek vazifesini berdi.

Toplaşuvda çıqışta bulunğan Meclis reisiniñ birinci muavini, Qırım Yuqarı Şurasınıñ deputatı Refat Çubarov qayd etti ki, mayıs 18 künü kolonnalarnıñ merkeziy meydan taba areketi ve vaqtı kelişildi. Bunıñ kibi de R. Çubarov Teşkiliy komitetke Mecliste de matem mitingine azırlıqnıñ ketişatı tafsilâtlı baqıp çıqılğanı ve tüzetüv ve añlaşma talap etken meselelerniñ işlenilgenini bildirdi.

Meclis reisiniñ birinci muavini şunı da bildirdi ki, Aqmescit şeer şurasına tüşken malümatqa köre Qırımnıñ cemaat teşkilâtılarından biri Aqmescit şeer şurasına mayıs 15 künü merkeziy meydanda açlıq tutuv aqqında ilân etmek ve bunıñ kibi de meydanda mayıs 18-de nasıldır toplaşuv keçirmege musaade etmek ricasında bulunğanlar. .

Qırım Nazirler Şurası reisiniñ muavini, Teşkiliy komitet reisiniñ muavini Aziz Abdullayev ve Aqmescit şeer şurasınıñ vekillerine hıtap etken Refat Çubarov şunı hatırlattı ki, Qırımdan sürgün etilüv qurbanlarıñ hatırasına bağışlanğan matem tedbirlerini azırlav ve keçirüv boyunca teşkiliy komitet tarafından evelden berilgen muracaatqa köre mayıs 17-18 künleri Aqmescitniñ merkeziy meydanı resmiy matem tedbirleri keçirilecek yer olaraq kelişildi.

Teşkiliy komitet azaları qatiyen tasdiqladılar ki, mayıs 17-18 künleri er angi başqa tedbirler başqa yerde, başqa vaqıtta olması kerek.
Meclis Kâtibiyetiniñ başı Zair Smedlâyev ve Qırımnıñ uquqqoruv organlarınıñ vekilleri Bütünqırım matem mitingi keçilgen yerde insan ve naqliye areketiniñ havfsızlığını teminlev kelişilgenini tasdiqladılar.

“ATR” telekanalınıñ baş direktorı Elzara İslâmova şunı da haber etti ki, tez arada ATRnıñ resmiy saifesinde yazılğan “Ant etkenmen” milliy gimnniñ yañı keyfiyetli variantını köçürip almaq mümkün olacaq. Gimnni orkestrniñ zil tutuvında professional yırcılar icra ettiler.

Toplaşuvnıñ soñunda diger meseleler de baqıldı.