Mart 15 künü Qırımtatar halqınıñ Meclisi İslâm İşbirligi Teşkilâtınıñ Baş Kâtibi adına Muracaat qabul etti

15 Mart 2014

İslâm İşbirligi Teşkilâtınıñ Baş Kâtibi
cenap İyad Bin Amin Madanige

As-salâmu aleyküm!
Bismillâhi rrahmani rrahim

Sayğılı cenap Baş kâtib!

Siziñ yüzüñizde İslâm İşbirligi Teşkilâtınıñ azası olğan devletlerge muracaat etemiz. Yarımadada yüz bergen adiselerniñ ketişatı Qırımnıñ eki million ziyade ealisi – ukrainler, ruslar ve bilhassa, İslâm dinini kütken qırımtatar halqı içün, qocaman felâketke çevrilebilir.

2014 senesi fevral 27 künü Qırımda mesülietsiz siyasetçiler devlet devrimini başladılar. Aynı vaqıtta mustaqil Ukrainanıñ terkibiy qısmı olğan Qırımğa Rusiye Federatsiyasınıñ qoşunları kirsetilip, mart 12 kününe olarnıñ sayısı 30 biñni arttı. Olar Qırımda ukrain ordusınıñ arbiy qısımlarını blok yaptılar, hava limanları, memuriy binalar işğal etti ve Qırımğa kiriş ve çıqış yollarını qapattılar.

Qırımnıñ çoqmilletli ealisi bilhassa Rusiye qoşunlarınen birlikte kütleviy şekilde kirsetilgen çoqtan-çoq yarıarbiy qurumlardan saqına. Qırımnıñ tınç ealisi ise silâsızdır.

Vaqialarnıñ böyle inkişafı dinlerara davanı qozğaybilir ve onda Qırımnıñ az sayılı tamır musulman halqı qırımtatarlar baş qurban olur. Qırımğa OSCE arbiy nezaretçileri, halqara teşkilât vekilleri, çet devletler elçileriniñ kirmesi sıñırlanğanı sebebinden vaziyet daa da beterleşe. Vaziyetniñ kergin oluvından BMT Baş kâtibiniñ mahsus elçisi cenap Robert Serriniñ Qırımnı terk etmege mecbur etilgeni delâlet bere.

Sayğılı cenap Baş kâtib!

Bugün bütün medeniyetli dünya Qırımda inqiraznıñ terenleşmesi ve Ukraina bütünliginiñ qanunsız deñiştirilmesi aqibetinde olabilecek qazalarnı endişe içinde beklemekte. Qırımnıñ çoqmilletli ealisi ise balaları, yaqınları ve soy-aqrabalarınıñ hayatı içün keder-qasevet içinde bulunmaqta. Er angi ande tüzetilmez qaza olabilir.

Sayğılı cenap Baş kâtib!

SSSRniñ kommunist rejimine ve HH asırda soyqırımğa oğratılğan qırımtatarlar yañı facianı yaşamaq telükesi altındalar.

Qırımda inqiraznı tınç çezüv yollarını araştırmaq içün Sizden itibar ve tesiriñizni işletmege rica etemiz. Qırımda yaşağan yüz biñlernen insanlarnıñ canını qurtarmaq, barışıq ve adalet oğrunda emin olmañızğa çağıramız.

Sayğılarım ile Refat Çubarov,
Qırımtatar halqı Meclisiniñ reisi

Aqmescit,
Qırım, Ukraina
2014 senesi mart 15