M. Cemilev: Meclis qırımtatarlarnıñ Suriyedeki arbiy areketlerdeki iştirakine qarşı

04 Sentâbr 2013

Milliy Meclis reisi, Ukraina halq deputatı Mustafa Cemilev bergen malümatına köre, Ukrainanıñ qırımtatar milletine mensüp vatandaşları Suriyede muhalifet tarafında arbiy areketlerde iştirak eteler. Aynı zamanda M. Cemilev şunı da qayd etti ki, Meclis olarnıñ Suriyege ketmelerine qoltutmay ve qırımtatarlarına anda barmaqnı tevsiye etmey. Bu aqta o “Іnterfaks-Ukraїna” saytına bildirdi.

“Menim bilgenime köre, anda bir qırımtatarı elâk oldı. Lâkin o, “Hizb-ut-Tahr” ir” teşkilâtınıñ tarafdarı. “Semetdeşlerimizniñ anda barmasını Meclis maqullemey, çünki bu bizim cenkimiz degil”, – dedi Meclis reisi.

“Asılında “Hizb-ut-Tahrir” tarafdarları arasında Suriyedeki qardaşlarımızğa yardım etmek kerek, dep aktiv teşviqat işleri alıp barıla. Meclis bu pozitsiyağa qoltutmay, çünki muhalifette kim olğanı añlaşılmay. Başar Assadnıñ ne boq olğanını bilemiz. Anda (muhalifette – İF), mencesine, yahşı bir şey yoqtır”, – dep qoştı o. Bunıñ kibi de Cemilev şunı qayd etti ki, Suriye muhalifeti tarafında ukrainalı tatarlar kütleviy sürette temsil eteler, demek olmaz”.

“Bu öyle degil. Anda öz isteklerine köre tek-tük adam ketti”, – dedi deputat. Onıñ qayd etkenine köre, Suriyege ketkenler qırımtatarlar içün ananeviy olmağan diniy aqımlarnıñ tarafdarlarıdır.

“Biz aksine er yerde Suriyege barmañız, deymiz. Çünki, bu qanunnı bozuv, demek, ekinciden, anda nasıl küçler temsil etilgeni belli degil”, – yekün çekti M. Cemilev.